【職場航行日誌】化妝=有運行? | cpjobs.com
Home > Career Advice > 名家分享 > 【職場航行日誌】化妝=有運行?

【職場航行日誌】化妝=有運行?

Published on Friday, 12 Feb 2016
圖:Shutterstock

聽聞中國有一名做Reception嘅女員工因為唔化妝又唔好好梳理頭髮就被公司突然辭退咗,而該公司人事部負責人表示Reception係代表公司形象,對儀容係有一定嘅要求。姑勿論係女員工真係外觀唔夠整潔企理或者公司睇佢唔順眼想炒佢都好,呢啲事件喺香港發生嘅機率幾乎係零。

 

香港地你行出街,會見到幾多個後生女唔化妝?就算唔畫眼線搽胭脂塗唇膏,都會識得用遮瑕膏遮下啲暗瘡,話素顏係呃你嘅。而且喺女多男少嘅社會,競爭愈來愈大,識化妝已經算係好基本嘅技巧,喺心儀對象面前又點可以俾佢見到自己個殘樣呢?

唔少公司嘅Appraisal都會有一項係「個人儀容」,只要你唔係衣衫不整、垢面蓬頭嘅話,一般係會俾中上嘅分,咁私人嘅行為俾低分真係好尷尬。男士衣著較易處理,著住燙到直一直嘅恤衫西褲,梳番個整齊嘅髮型就無問題,而女士嘅煩惱就大得多啦。髮型、妝容、衣著和飾物缺一不可,更加講究到連指甲油花色都要配合唔同嘅活動場合。

係咪化咗妝就會加分?相信男士嘅眼光會更加準確。以我男友同身邊男性朋友嘅準則,對於鍾意效率和結果論嘅佢地黎講,唔會在意有無化妝,只要望落整潔精神,舒服嘅感覺就會令人想親近,如果花得太多時間去帶上假面具而效果平平,反而令佢地反感。有唔少女仔唔識控制力度,胭脂水粉重手咗,搞到塊面無晒應有嘅光澤,再加上誇張嘅Bling bling眼同閃令令嘅嘴唇,同事見到面,打完個招呼就立即笑笑口離幾丈遠。就算幾熟都好,出聲提佢驚Hurt到佢無晒面,或者令佢自信到誤以為你不過艷羨佢出眾嘅外表。

當然,成功例子係有嘅。本身皮膚保養得宜膚色又白晢嘅話,只要輕輕修飾小瑕疵,係咁意補個淡妝,衣著大方得體,轉個身睇夠晒神采飛揚!唔好吝嗇展現友善嘅笑容,女神仲唔係非你莫屬?香港女仔好多時就係失色喺笑容上面多過去比較化妝技巧。係人天生都想親近一個會散發正面氣場嘅人,做Reception又好,高層又好,每次見親你都係黑口黑面或者苦瓜乾咁,一句說話都嫌多,有咩開心Share都唔會諗起你,到有需要想搵人幫手時,其他人聞聲已雞飛狗走。化妝只係小技倆,單單因為無化妝就炒人好唔可信,如果係介意樣貌面試當日見完就篩走咗佢啦。想有運行?學習由裝扮上面散發正面嘅氣場,加埋睇得順眼簡單嘅妝容,印象分滿分了。

其實唔使刻意為自己加工,自然嘅笑容比起「揼本」化個靚妝有市場得多。

 


 

Become our fans