【職場航行日誌】打工仔心經要聰明地「被需要」 | cpjobs.com
Home > Career Advice > 名家分享 > 【職場航行日誌】打工仔心經要聰明地「被需要」

【職場航行日誌】打工仔心經要聰明地「被需要」

Published on Friday, 15 Jul 2016

Office入面有班又乖又勤力嘅小薯仔,日日準時返工,好努力去Take up同人工唔對稱嘅Workload,不過好似總係會受到唔公平嘅對待。眉精眼企嘅Team head一睇到就知呢班係筍盤,當然會爭著收為己用,就算使到盡,小薯仔都唔會有聲出。唔想做一嚿永遠孤單「砌野」嘅小薯仔,除咗最簡單用下旁門左道打關係,最實際去突出自己嘅才能就係要先改變「做完咪算囉」嘅思維。

做上司嘅其實好傭懶,一方面想依賴下屬幫佢清理晒手頭上接唔停嘅Paperwork,另一方面又想「聰明地被需要」,一味死跟指示只會令佢困擾,佢口停你就手停,有問題唔識自己先去嘗試搵可行嘅答案,到頭來又係要佢諗,咁你嘅價值只會維持係低水平。

小熊諗返起初入行,淨係識用舖蠻力去做嘢,驚錯所以唔敢亂行。就算Sense到有問題,又怕講出嚟會被大家嘲笑連咁基本嘅常識都無。公司規模愈大,距離感愈強,一個小錯誤都怕會傳遍每個樓層。其實又唔使諗到要越級挑戰咁高難度嘅,只要令到直屬上司喺處理公事方面無咗你就揦手唔成勢之餘,又喺最後決定上被你冠冕地需要,自然對你又愛又恨。

好顯而易見嘅一個例子就係,上司經常開完會,對下屬是但講兩句,就吩咐佢地轉頭Draft番一個E貓俾佢睇,有同事一聽到要憑空作句,又明知時間緊逼就會好騰雞,立即周圍問人有無類似嘅Template抄考下,搵唔到仲係零進度時,又忍唔住走去問上司攞多啲資料先再度下點作果幾句嘢。上司就會碎碎念,交代工作時有重要問題應盡快問,唔係用一段時間搵外援不果再將個波交返俾佢就叫做咗嘢。同一個Case,有同事會先Drop低E貓要講嘅重點,將啲來來去去嗰幾款嘅官方字眼剪貼喺內容嘅頭同尾,Proof read多幾次,讀出嚟順口嘅,其實已經可以Pass俾上司Consider,最緊要做到簡單而禮貌地講出主題。大部分上司都係心急嘅,佢心目中根本無一個標準答案,不過係根據你嘅Draft修改一下。佢要嘅係你幫佢慳到心機時間,呈上功課俾佢最後批閱,夾手夾腳快手Send出去就十分架啦!佢手邊即刻少咗樣小事掛心,對你印象會提升,亦表現到你係可以獨立處事嘅。

當然,醒目嘅上司係會事前俾足夠嘅信心小薯放膽去做,「主要係同大老闆報告番頭先開會我地決定咗啲咩,再交代番會再幾時Follow up就得架啦,好似你平時寫Email嘅Tone就Good架啦,大老闆咁鬼死忙無時間慢慢嘴嚼,記得唔好嘥你自己咁多時間啊!」小小嘅溫馨提示,令到小薯知道唔使過於大費周章,可以安心啲去用自己嘅方式盡快整個Draft,而上司亦得到一份有心機嘅功課。

喺細公司的確少好多呢啲障礙,喺資源有限嘅情況下,顧唔到咁多是是非非,比較容易培養到一團火群策群力搞好每個Project,一齊衝一齊捱,上司下屬嘅溝通更直接有效。大家一直緊密地被互相需要。上司忙到甩轆,要求嘅工序要快,佢一定要相信下屬能力先可以順利完成每個Task,相對地小薯自由度大咗,可以發揮嘅地方就更多。

打工仔無論做上司定下屬,都要聰明地被需要,先至感受到做緊果個職位嘅價值。

圖:Shutterstock


以上文章刊於《招職》。

Become our fans