【職場航行日誌】未轉Perm唯有忍氣吞聲 | cpjobs.com
Home > Career Advice > 名家分享 > 【職場航行日誌】未轉Perm唯有忍氣吞聲

【職場航行日誌】未轉Perm唯有忍氣吞聲

Published on Friday, 07 Oct 2016

而家入職公營機構或者係政府工,大部分由合約工開始,二至三年年期,話少唔少,無人敢寫包單一定有得續約,做左一年半載嘅時候就要諗定後路。就算做多一兩份合約後有機會申請轉Perm,之但係阿頭俾嘅Apprasial個分唔靚仔,可能只係一條掘頭路。

有無得續約,除非咁唔好彩機構要Cut budget或者成個部門轉Structure,否則多數都係人為因素決定你嘅去留。有人可以日日舔老闆腳搏佢高興,有人不屑討好,當有忍受唔到嘅屈辱時會拍枱出聲,有人白白讓時間過等運到,呢三種人小熊都見過。其實,都係睇你份工嘅前途仲有份糧嘅重要性去到邊。第一種人小熊細個唔識野會鄙視,梗係諗著做人要有骨氣,使唔使咁樣托大腳法,醜唔醜架。當儲多幾年社會經驗嘅時候,就會自愧不如,因為自己固執嘅性格係永遠做唔到佢地咁樣能屈能伸。只要佢地唔係有害人之心,為份工去搏老闆開心係人之常情嚟嘅。

聰明嘅擦鞋仔,佢地通常係比一般人更加怕無咗份工,所以情願把心一橫去到盡捧到老闆上天,最多都係忍耐三幾年。喺適當時候識得滿足下老闆嘅虛榮心,老闆覺得你聽話,可以「食住你」,對你自然順眼啲。喺重要關頭你閞聲拜託佢幫手,都易啲應承你啊!到成功轉咗Perm啦,啲野咪長命工夫長命做,得閒同老海鮮打好關係,忍一時以後日子就好過了,計番條數好抵啊!

而第二種不屑討好嘅人屬大多數,一般出咗嚟做野幾年又還晒Grant loan嘅打工仔,經濟上負擔已輕咁一截,即使突然無咗份工亦唔會無飯開。本身有積蓄嘅話真係就算唔開工幾個月只要慳著使絕對唔成問題,問題係份工值唔值得你去扮演一個好可能你會討厭嘅自己。小熊會諗,如果我做緊呢個位對於將來考升職位有用,人工又合理,落力去表現得好啲點都無壞。萬一喺合約中途被人炒咗反而前功盡廢,有個衰Record出咗去好難入得返嚟,或者要等時間慢慢洗底。

對住啲自命清高嘅老海鮮,捽到你陀陀擰,唔好俾佢地拋窒就咁放棄份工,諗計去超越佢。記得人前人後對佢地禮貌,特別喺政府或公營機構呢啲咁階級主義同玩年資嘅地方,發脾氣黑面係禁忌,老海鮮嘅笑裡藏刀好老練架,你稍為控制唔到自己情緒已經會遭人話柄。唔想被人當傻仔咁舞來舞去,要訓練有極好嘅EQ和耐性,表現大方得體啲客觀啲。雖然係相當高難度,不過呢,只要你過得到關,喺個崗位上企穩咗,人地自然會好現實地對你改觀,到時你點樣擺個唔Like樣,最多咪玩下排擠,想郁你都無符,如果你完全唔在乎人地玩呢啲小學雞把戲,係幾過癮架!

第三種等運到嘅人係最易做,唔使用腦思考隨心想點就點,咁份工其實亦對你可有可無,小熊仲有咩好講呢,無啦,好自為之,唔好無咗份工嘅時候嚟喊咁口。

 

圖:Shutterstock


以上文章刊於《招職》。

Become our fans