【職場航行日誌】老闆算死草 唯有自求多福 | cpjobs.com
Home > Career Advice > 名家分享 > 【職場航行日誌】老闆算死草 唯有自求多福

【職場航行日誌】老闆算死草 唯有自求多福

Published on Friday, 23 Sep 2016

小熊自問對「老闆」呢種生物一向無期望,點知人嘅行為真係太難預計,一單衰過一單,一鑊「杰」過一鑊,吝嗇又小家嘅事傳遍整個部門足足十幾廿年,依然可以我行我素,究竟自信從哪裡來?好想知!

分兩類人講,一啲就黎退休嘅「海鮮」老闆明明人工唔錯,除咗喺新同事入職嗰日請過食飯之外,就以後都唔會再有咁嘅機會啦!無錯,就算係成條Team一齊同新人去食Welcome lunch,老闆只會請新人一個,其他人唔該AA,一講錢就會分得好清楚,唔使旨意喺佢身上搵到丁點著數。當老海鮮拎啲一盒二盒嘅曲奇、蛋卷、糖果、朱古力返嚟Pantry時,新同事誤以為海鮮咁闊綽專登買嚟慰勞吓同事,舊人已經充滿戒心,第一時間提醒食之前翻去後面睇一睇個食用日期到幾時。係啊,以前出過事架啦,有同事好雀躍拎曲奇食,一咬,膉嘅!好明顯過年嘅賀年禮盒食唔晒,諗住反正擺咗喺屋企幾月只會繼續擺,不如借花敬佛請同事食。我地睇睇個底,全部已過期,再打開望望,唔係霉咗就係淋晒。大家靜靜蓋番好晒返埋位,無人敢講亦無人再敢食。老海鮮如意算盤打唔響,反而奠定咗佢孤寒至極嘅形象。

錢銀始終係身外物,公事上都係咁嘅話,跟得佢嗰個可能前世真係做錯好多事。一日到黑嗌忙嘅老闆,其實佢有幾多野做緊大家心照,收到Request後係E貓按個Forward掣,加句Please proceed就安坐喺大班椅等收功課。打兩個字就可以置身事外,除咗爽還是爽。好啦,下屬無得Say no唯有硬食,了解完有野唔清晰向老闆Clarify,老闆口中通常只會出現「唔知」、「自己諗」呢啲令人氣餒嘅字眼。老闆你依賴我嘅工作能力,我都信任你過濾咗個Request,知道我地需要作出咩Action,而唔係一副懶理嘅樣。逗咁高人工,唔該做下樣出少少力啊!佢貫徹咗「多做多錯,唔做唔錯」呢句至理名言,可以完全唔顧下屬感受咁去做人。對佢嚟講,可能係一種成就。

另一種係「嘴Gel Gel」搲著數嘅老闆,經常擺明車馬「接收」部門嘅剩餘物資。每次明知有活動都會突然好生猛同搞手打好關係,落足嘴頭叫人買佢心水嘅野做禮物,暖水壺啊、叉電器啊呢啲一定唔少得,仲有一大堆現金劵,數量上一定超出原本嘅預算。老闆算醒架,有剩嘅唔會立刻喺人前拎走,到咁上下時間佢就會主動提醒搞手啲現金劵就過期或者啲禮物過時,送俾人都唔得體啦,「不如我幫手分俾啲同事」。點分配?心知肚明啦!老闆開到聲,唔通拒絕得出口?你唔怕自己個飯碗凍過水咩?

喺工作上對住佢地係有隨時激到扎扎跳嘅心理準備,有時經理們想統一下各Team喺文件上唔同做法,叫老闆一齊開個會討論下啲Template嘅Final version,佢諗都唔諗就話好,叫佢地喺Canteen叫柯打Tea食住傾,咁當然係出公數啦!講漏咗,份Tea只係叫俾佢一個人食。夠鐘開會嗰陣,老闆喺頭半個鐘內一邊聽住經理們Present一邊悠閒地食住熱狗嘆紅豆冰,食完野都唔執就話要趕住走。臨時醒起有緊要野同其他部門阿Head傾,Template嘅事交俾大家處理佢好放心。咁嘅大話搵鬼信?經理們真係企晒喺度,主角原來不過借佢地過橋,想明正言順搵個藉口食免費Tea,但係野就做唔到。唉啊,老闆,乜你咁窮架咩?

 

圖:Shutterstock


以上文章刊於《招職》。

Become our fans