【職場航行日誌】葡萄完咪又係咁 | cpjobs.com
Home > Career Advice > 名家分享 > 【職場航行日誌】葡萄完咪又係咁

【職場航行日誌】葡萄完咪又係咁

Published on Friday, 25 Sep 2015
圖:EPA

「十八般武藝樣樣皆精,咁又點喎?」喺我地公司,有一位眾所周知嘅「超人」,呢位三十出頭既男士唔只外型睇得,仲Talk得玩得!幾乎每次公司活動佢都舉手踴躍參與,而且表現認真出色,當然深得一班高層人士喜愛!我地都好驚訝佢作為一個Senior,晚晚加班到九點,何來有咁多時間練習?無可能連覺都唔瞓吧?

 

有一次因為有官員到訪,我「被自願」要參加跨部門合作嘅一場音樂會,曾聞說過佢過人嘅天才,喺未開始著手揀歌時已有壓力,而且練習時間已經非常緊逼。呢位隊長先了解我地組員嘅功力去到咩程度,再去重新編排樂器嘅合奏。唔係神人級,又點可以一力包攬上身?

的而且確,每次佢表演時,大家都見到佢嗰位女上司嘅手機鏡頭係隨住佢移動,在坐嘅女同事帶住充滿崇拜眼神醉心欣賞。雖然佢已經名草有主,殺傷力應該大減,但對於唔少男同事嚟講,一陣濃郁嘅葡萄酸味不停傳出。「花咁多時間玩呢啲花邊活動,專心做好份工咪夠囉!想喺咁多人面前攞彩啫!」不過就係正正人地做到,你做唔到,咪酸溜溜!

愛出風頭係佢本性,由於佢擅長玩音樂,不時Friend搭Friend為明星伴奏,喺面書Share同明星嘅頭貼頭合照,一出Post不下二、三百個Like。我自己個面書都只係得400個朋友,比唔上佢有2,000幾個「朋友」。佢過人之處唔單止識得人多技能多,又識得湊老闆,對身邊嘅同事亦扮演「大哥哥」榜樣。結果就係上位好似坐火箭咁快,老闆去到邊Social都帶埋佢炫耀本事,每次碰面佢總係展露自信滿滿嘅笑容。

其實,大家對佢既葡萄只限於表演既時刻,私底下真嘅評價係對於佢對人嘅態度同埋做野背後嘅動機。特別係身邊最熟悉佢嘅同事,對呢位佢地稱呼為「萬能嘅Social友」有些少敵意,「係嘅,佢講野係有感染力,好易俾佢矇騙咗,一邊讚你一邊不停請你幫手做野。對女同事仲勁,見到迷人嘅眼神咩都Say yes啦!」又好似我呢啲俾阿頭蹂躪得多嘅人,有時聽幾句同事好話就會上當。「佢成日聽大佬話要將我地部門搞到有聲有色,三個月就搞一場Show,成日拉我去夾Band表演,有一排真係忙到嘔電,但係佢話已經同我阿頭講掂數,叫埋我Join!大佬,你先斬後奏,搵我阿頭做籌碼,萬一我Say no就搞到佢無面,真係好野啦你。 」

佢的確聰明,運用魅力、權力令「被利用」嘅配角同事喺活動上為佢多抹上幾度光彩。「你知唔知啊?佢鍾意星期六日約啲同事同埋自己Friend廿幾人一齊去郊遊,互相係唔認識架,都幾尷尬。佢做搞手Lead住成堆人就好Enjoy咁,重點梗係影大量相Share喺面書啦,俾人知道佢多朋友,放假嘅節目係幾咁豐富精彩!」

仲會葡萄?咁樣做人太辛苦啦!工作上對住高層嘅虛情假意都理解既,佢都係「被利用」嘅得力棋子之一。之但係自己受完,就唔好對自己同事都係咁,咁大個人玩心計點會無人發覺?只係識得結果論嘅人其實最後唔會成功得去邊,就拭目以待啦!

 


 

Become our fans