5個見工被Reject嘅原因 | cpjobs.com
Home > Career Advice > How To Find A New Job > 5個見工被Reject嘅原因

5個見工被Reject嘅原因

Published on Monday, 19 Jun 2017

見工被reject有好多原因,可能係你對手表現太強勁,可能係唔夠自信、可能係個test唔識做、可能係唔小心寸親小氣嘅interviewer。除左呢啲常見嘅原因之外,其實仲有好多原因未必純粹同表現有關。

1.工作同expectation有出入

有時被reject其實未必係一件壞事,點解咁講?話說有一次薯仔公司要請個會計部秘書,有一位應徵者叫林多左小姐,林小姐見工嘅時候表示自己對會計呢方面好有興趣,甚至表示有興趣進修會計,最終成為專業嘅會計師。聽落好上進咁喎,唔請佢請邊個?但係請留意返,會計部主管只係想搵個幫手處理下啲文件,唔係想搵個咁有passion嘅人返嚟。林小姐今次諗多咗,我相信如果最終真係請咗佢,佢都應該好快會因為工作同預期有落差而辭職。雖然林小姐見唔成份工,某程度上對佢嚟講其實都係一件好事嚟。

2.太Jumpy

有人話魚唔過塘唔會肥,但其實過多幾個塘、肥到一個點之後,就好難再搵個塘畀你過。其實將心比心,你係老細都唔想請完冇幾耐又再請人,train一個人係好花資源同時間,而且員工要留喺公司足夠耐嘅時間先可以熟習到公司嘅運作。十年轉五、六份工其實都已經算好Jumpy,如果唔係公司超級等人用,都儘量唔會選擇一份jumpy嘅CV。

3.CV太吹噓

當收到你份CV之後,HR就會努力喺CV上面搵出可以搵你上嚟見工嘅理由。一般大家都會喺CV上列出工作上面嘅職責、經驗、戰績,我地就靠呢啲資料去搵最適合嘅人上嚟。不過,爭取到見工機會唔等於成功,有啲人喺CV上面吹到自己上太空,最怕係寫就天下無敵,做就有心無力。上到嚟interview,主管一問就知龍與鳳,唔叮你走就奇。

4.誠信問題

誠信對每間公司嚟講都好重要,如果發現誠信方面有問題,好多公司都會選擇唔請。其中一個常見嘅誠信問題係虛報學歷,明明未畢業都照寫落CV度,誤導公司以為佢有較高學歷。結果去見工時提交唔到學歷證明,一問之下先知原來根本冇畢業。咁做雖然係爭取到個見工機會,但對公司嚟講係一個極壞嘅印象,有「博大霧」之嫌,結果最後都係浪費大家嘅時間。

5.你我相隔多麼遠

平時幫唔同部門主管搵人,佢地各有各要求,各有各特色,不過有一點對於唔少主管嚟講都特別吸引,就係位求職者住得近。只要求職者住得遠少少,就算面試表現好,都可能會跌落waiting list。根據香港規劃署嘅資料,香港有50%以上嘅人口都喺新界,未來十年仲會陸續增加。當十個有六個求職者都係新界人,要睇埋地區請人,請人真係難過登天。樓價繼續高企,價位稍為負擔得起嘅樓都喺新界,難怪未來大部分香港人都會搬離市區。當住得遠變成難搵工嘅原因,呢個會唔會係香港社會嘅悲哀?

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans