Career Advice Job seek in HK

OL是咁嘔血的

轉型成為自由工作者一年後,有時會回想起喺某大機構工作,嗰五年身為「半個OL」嘅生活仍然猶有餘悸,每日要用半個設計師同半個OL嘅腦袋交替運作,一邊構思設計,同時處理繁重嘅文書,仲有不停嘅電話、電郵、開會等等溝通工作,工作以外,打扮談吐禮儀,由內到外樣樣都要執到正一正,IQ、EQ、AQ,少啲乜Q都唔掂,簡直「人都癲」!嗰五年令我知道, 要成為一個稱職嘅OL,原來一啲都唔簡單!(尤其對只係個偽OL嘅我而言,當然做設計同樣咁唔簡單啊~)

OL是咁嘔血的
電視劇中嘅OL是咁的,只係負責Print下文件、打下電話、計下數、扱下印仔,似乎全部都係手板眼見功夫,仲得閒到可以成日去廁所補妝、喺位塗甲油、去Pantry圍埋吹水講壞話(咁我又唔係話冇…哈哈哈),現實係,只係處理文書就需要用好多腦力,記性要好,思路要清晰,對公司上下架構人事要有一定認識,好多時要一心多用身兼多職,加埋要同幾百種性格「好得意」嘅上司同事供應商協調溝通,忙起嚟、出事起嚟,閒閒哋嘔幾萬噸血,都仲要你彈返起身繼續做。

有得揀你揀唔揀?
做OL原來咁恐怖㗎咩?其實又冇我講得咁極端咁恐怖,或者好多人都冇諗過,好多嘢其實仲有得揀,就算好怕揀錯或者曾經揀錯,都仲可以再揀,有得揀你揀唔揀?如果揀,又要點揀?

•    自我對談 認識自己
近年好多媒體訪問都問過我「畢業生選擇行業時需要注意啲咩呢?」我都會答:「一定要搵到同選擇真正喜愛嘅行業同工作崗位,當你夠喜愛佢,熱情足夠,你就自然願意花時間心思去做,願意思考如何進步,自然會做得好做得滿足。」由細到大,我經常花時間同自己傾計,聆聽自己內心想法同感受,亦要誠實地審視自己能力強弱項,當感覺到需要轉變嘅時候,就算一時三刻因應付生活不能夠即時改變,都默默地做,做好有一日跳出去嘅準備。搵到自己喜歡嘅行業,了解自己能力水平,喺職場大海中揀適合自己、能夠活出自己嘅崗位,係其中一個最重要嘅人生選擇。

•    面對自己 作出改變
認識一位老師,佢有句口頭襌:「How you do one thing is how you do everything」每個人都總會有一堆弱點或者缺點,當自己察覺到,甚至有人話你知嘅時候,你可以揀繼續視而不見,搵一大堆藉口故步自封,最後相似嘅後果會一直重覆發生,反而,嘗試放低自我,作出小小嘅改變,或者就能夠將自己帶去另一個層次。

•    調整心態 適應環境
一樣米養百樣人,喺職場上最難處理嘅往往唔係手頭上嘅工作,而係同百樣人協調溝通,出咗事,小則是非滿天飛,大則影響工作,有時唔好彩入咗間多是非嘅公司,口舌是非日日新鮮,就算你幾勤力盡責,只要講錯一句說話,分分鐘搞到一身蟻。所以調整心態,小心選擇可信任嘅人,選擇溝通方式,選擇說話內容,可以大大避免到令自己身入險境嘅情況,能夠將溝通技巧拿捏得宜,工作更加事半功倍,更可能可以喺複雜嘅職場中建立到真誠嘅友誼。


你可能心諗講就講得易,係㗎,要學識「揀」係人生一大學問,我都仲學習緊,
世界只會不斷變,每個人每一日都係一個新人,我好喜歡一句說話:
「山不轉路轉,路不轉人轉,人不轉心轉。」
面對多變嘅人生,等我揀個好心情上路,再見。