Career Advice 名家分享

【職場航行日誌】一份CV看穿你

做HR係好八卦嘅,做得多 Routine work,最新鮮嘅事梗係過濾新收到嘅Application啦!一份CV,基本上睇晒佢呢個人由要自己開始去判斷是非時,離開中學後選擇咗一條咩路,決定揀咗入邊間公司為將來鋪路,字裡行間就睇到一個人大致上花咗幾多時間經歷啲咩,係好珍貴嘅資料。

每個職位申請,大家表達自己嘅方式都大不同,多多少少睇得出個人性格係點,好Show off事無大小都List一餐?定係比較含蓄只係寫認為我地要知嘅事實就夠?又抑或喺網上左抄右寫走出一堆唔通順嘅Job description嚟交功課?哼哼,憑著曾經過濾數千數萬份CV嘅精明眼HR,邊走得出我地嘅法眼呢?不過,唔洗驚,八卦還八卦,幾時都記得目標係要為公司做啱Matching!

「呢位人兄雖然一直喺細公司做,但真係好捱得,讀大學個陣同時做兩份兼職,仲要係辛苦到無人有嘅侍應,做足三年,之後未正式畢業已經出嚟搵食。拿,啱啱入咗間銀行做啦,叫做捱出頭,我係對為生活捱過嘅人有情意結,你唔覺得好Man架咩?」喺未見真人之前可能會加咗唔少自己幻想,啱啱做咗人妻嘅Maggie好欣賞靠自己雙手努力而非富爸爸嘅人,成果唔係即時見到都唔會毅然放棄,Maggie成日希望有能力俾到一個機會佢地去發揮潛力。

「我鍾意有咩用,都要請人嗰位高高在上嘅部門主管點頭先得架,佢就話自己最實事求是嘅,睇嘅係客觀事實。咁佢今次講到明要求啲Applicants要喺大規模嘅公司有至少四年相關經驗先肯見,咁你有佢符咩?」小熊自己都明知要符合老闆要求先係王道,無得替人地唔抵,努力並唔一定係最佳賣點,要夾晒天時地利人和,根本講唔清。

感情還感情,做事始終要分明。特別係而家好多時User請Junior位時會覺得學歷過高或人工偏高,會擔心請咗返嚟,同事仔係騎牛搵馬心態,搵到人工更高嘅立即走佬。諗諗下不如揀啲Green嘅白紙,但見到又無咩參加過課外活動和連兼職都無做過吓,會唔會唔捱得,多野做啲或者受吓氣就頂唔順呢?到比較Senior嘅Post,有多年嘅工作經驗嘅想有Offer一定實食無黐牙,寄黎嘅Application form好似都差啲唔夠位俾佢落筆寫晒啲豐功偉績咁,CV更加無十頁八頁都唔見得人咁。有呢啲搶手貨User又頭痕啦,要度好個Package去吸引佢,如果真係請佢一個可以打十個,出高啲價當然有好大空間斟酌啦!不過公司Budget嘅野,要將就架嘛,你明架啦。

CV可以偽裝,見到真人以為討好嘅性格都可以係騙人技倆。就算係Interviewer一樣會玩同樣手段,明明係一個死位,做過嘅人一個接一個未過試用期就急住遞信走,通常一係Workload超晒標,一係就上司或同事相處出問題。喺Candidate面前當然要好好掩飾哄佢地入局,講到唔太辛苦得嚟又會得到全面嘅工作經驗。對大家嚟講,互相出招鬥快鬥準去賭博,睇下邊個夠眼明手快睇得穿對方!

 

圖:Shutterstock


 以上文章刊於《招職》。