喺公司，慶幸上司嘅座位唔喺我前後左右伸手就到嘅位置。這一段小距離令我每次聽到佢走過嚟嘅急促「噠、噠、噠」高跟鞋腳步聲時，總能夠有多兩、三秒準備。將個Screen校返去工作嘅畫面，忍手唔好篤電話住，忍口唔好食到一嘴零食住，保持一個最整潔，最合佢心意嘅落力工作下屬形象，再加送一個佢突然造訪時嘅愕然眼神，一切裝作自然。

可惜唔係每次都可以表現令佢稱心滿意，試過有一次，由於佢本人身形比較細粒嘅關係，基本上佢企我身旁嘅時候，係會對正我嘅耳邊講說話。「阿熊，你咩都唔好搞住，幫我拿拿臨搵呢個人嘅P file先，叫John Chan，好似係2007年Resign嘅，即搵啊！」極度急燥嘅佢想轉身就走，我當然唔俾佢走住啦，咁少資料我點搵到啊！「我想問呢 …… 有無佢全名？可能有唔少同事都叫John Chan，啊 …… 其實如果有員工編號就可以Check到晒佢啲資料啦！」以為係正確嘅溫馨提示，點知阿頭突然飆高音，我望住佢搽咗桃紅色嘅雙唇不停張合，「無啊，無啊，而家呀姐淨係比咗呢兩樣資料我，你搵唔到咪叫其他人幫手！總之要快啊！呀姐急住要架！」然後頭都唔回就極速返埋自己位。

當時震耳欲聾嘅尖刺聲音徘徊咗喺我腦入面好幾秒，反應未嚟得切，人已經移步去咗Filing Ｒoom開始搜索。望咗啲File一陣，開始覺得唔對路，被阿頭搵笨，我決定喺System同埋喺Termination嘅Record搵，終於有兩個疑似目標嘅John Chan，再問問我Team buddy嘅意見，搞掂！不過我係好衰，明明搵到，嬲嬲地都係擺多一陣先比佢，為嘅係爭取多少少時間做其他野。

幾個同事見我返埋位，靜靜雞過嚟問我，「有無事啊？頭先佢失驚無神咁高音講野，嚇死人咩！搞咩啊又！」我慢慢Load返剛才嘅情景，開始有啲怒火中燒，「唉，耳仔都痛埋，差啲想推開佢，次次都係咁，你話啦！佢有咩係唔急架？唔係玩飆高音我就可以即刻變到佢想要嘅野！」

過多十分鐘，我先施施然咁拎個P file比佢，意想不到佢嚟多一下飆高音，「好叻啊！咁都比你搵到嘅！」笑笑口伸手搶咗個File準備去呀姐房邀功，揮揮手示意我可以走。佢啱啱係咪讚我？好似第一次聽到，但點解只覺得背後一陣涼意。

故意提高把聲講野，如同潑婦一樣，明知自己無道理無亮點，唯有運用聲線去令你留意佢。下次我真係要大反應啲扮嚇親，等佢喺人前面有難色，令佢收歛一排都好。

圖：Shutterstock

以上文章刊於《招職》。