細個出街影印張紙要五毫子一張，會好小心用個File入住，驚死整到佢皺起，希望重複用到N次，N次後都會用嚟包果皮或者墊完枱先捨得丟掉。到大個出黎寄信求職，要大量影印履歷表、身份證、學歷和工作證明等，一路俾錢一路都仲識得肉赤，不過到安坐喺辦公室嘅時候，問題就開始嚟啦。

原來喺辦公室工作幾乎可以無限任用紙張，就算唔小心印錯、印多咗，只要將佢地放晒落碎紙機就一了百了無人知，特別係人事部部門，需要用嘅紙張量經常係公司長期排行第一位。雖然我地作為用家明知有好多不必要嘅浪費，不過公司唔肯落Policy，管理層唔願意革新，小薯仔只好言聽計從。

我老闆就最鍾意Keep hard copy，啱啱入職時，同事帶我「參觀」檔案室，每一行都係塞到滿一滿嘅File同埋每年每季每月都話好緊要嘅Report，忍唔住問左句：「啲File會幾耐清一次？咁Full嘅！」同事話一年一次大執，都係清得好少，只要老闆覺得仲有啲用都好驚死唔銷毀，「將次要嘅資料燒落隻光碟度儲低唔得架咩？」講講下突然醒起舊公司過往嘅做法。「咦？你呢個方法幾好，之但係老闆實唔Buy…古板到死，除非…換左個老闆佢，嘻嘻！」

除咗公家做Filing嘅Box file，老闆要我地Team習慣開File再Keep多次Record，其實已經有Soft copy hard copy啦，再影多份又有咩意思，都唔知有幾可需要用到，最得人驚嘅係佢工作咗廿幾年曾經好自豪講過由第一日返工收到嘅第一個Email開始，會逐個印晒出嚟入File。你知啦，有時一個Email有好長嘅對話，係重要嘅，印個Final version就夠。老闆而家儲咗約三十個佢專用嘅Box file，對佢黎講係寶嚟嘅。唉，究竟咁耐以嚟有幾多紙只係額外For佢自己用？而且公司每日都有兩三個宣傳或者小資訊嘅Email，一般人睇完唔關自己事或者無興趣就會順手Delete，慳番啲位做正經野好過！我老闆咁珍而重之，佢對公司有歸屬感係值得尊重，但係無效率又浪費資源嘅事應該盡量避免，更加唔好逼下屬一定要跟你呢套嚟做。

如果你行過每個同事仔嘅位時仔細啲睇，枱底都係暗地裡收埋左一朵朵大紙花，寫完嘅Draft和多餘咗嘅紙張愈積愈多，Confidential嗰啲又唔可以即時放落回收袋入面，慎防資料外洩，先要拎去碎，不過又唔想俾同事覺得你太空閒去做呢啲工夫。久而久之，紙花就鋪晒塵，更加唔想理，分分鐘啲紙疊高到連對腳都無位擺。其實堆積如山嘅紙張係咪可以有方法減少呢？

無限制咁用紙係方便用家，不過無管束係好易令人唔自律，即使用唔著都係零代價嘅，所以上網睇到有咩食譜、旅遊資訊、優惠劵啱嘅咪印出黎拎番屋企慢慢睇！工作上印文件時甩咗少少墨印得唔靚咪印多幾張比較下先俾老闆囉！聽聞有水喉充足嘅公司有先見之明諗到好計，平時HR開Interview Board，一向係預先印好晒一疊疊Candidates嘅CV同相關嘅Assessment Forms俾Panel，而佢地就用iPad代替，每個Interview Board約莫慳到二百張紙，一年條數都幾襟計！仲有，如果你係個Candidate，見到Panel用iPad咁先進都會覺得特別型啦，立即提升左公司形象！另外，再Set番用Printer嘅Quota掣俾每個同事，用完就要向Supervisor申請，如果真係當月較多Job做，Supervisor應該都無意見即刻Approve，唔係嘅話就要諗定點解釋啦，用群眾壓力推動同事珍惜用紙，都係其中一個好方法。

小熊咁耐以嚟都「作業」得多啦，預咗下世要做樹架啦，你地呢？

圖：Shutterstock

以上文章刊於《招職》。