Career Advice 名家分享

【職場航行日誌】請不要盯著我電腦屏幕

無論係屋企又好,公司又好,長時間盯著人地電腦屏幕睇係幾「賊仔」行為,亦令用家周身唔自然。隻滑鼠移去咩位置,開咩檔案,打信時睇邊份Template,點樣改嚟改去個Draft E貓俾老闆,所有行動係表現咗當時我個腦諗緊咩。喺工作嘅地方,邊有人想俾人睇通睇透,特別係爭緊上位嘅同級同事和監察住你表現嘅上司。

「阿東,個Excel你入好未?哎呀,你唔好而家打啲Reference letter住啦,今日收工前我要將個Excel send比人地參考啲Data啊!」阿東聽完連聲「哦」求其應住咩都急一餐嘅May姐。十分鐘後,「阿東,你喺度覆緊咩E貓啊?好急架?」講完隨即喺位起身行埋去,對住佢個Mon指指點點,要佢邊聽住指示邊入埋個Excel。

呢個情況喺Office好常見,上司正正坐喺下屬後面,話就話有個Partition,但有咩用?昂一昂高個頭,前面嗰位係認真做緊野定Hea緊便一覽無遺。對於係Fresh grad嘅阿東,當然有苦難言,同我地食飯時忍唔住呻過,「喺屋企如果我阿媽係咁我實出聲嘈架,好似裝我係咪做衰野咁,點知返到嚟一樣。May姐可能覺得好方便啦,Anytime捉我有無偷懶,真係好唔舒服囉……信我唔過咁。」喺被監視嘅侷促工作環境下,工作上又無自主嘅自由,唔好話做到累想偷偷地開個細視窗上陣網睇吓野,就算正正經上網查字典或者查吓最Update嘅勞工法例,感覺到有對眼喺後面,都會無故壓力倍增。

我地呢班出咗嚟打拼咗三幾年嘅人其實好明白,已經無需要時刻俾人睇到我係「努力中」,只要最後製成品出咗世老闆滿意就得架啦。面對住心急易燥底嘅老闆,有時硬係要企定定蹺埋雙手喺你隔離睇住你即時Edit,唯有叫自己冷靜啲唔好露出面紅緊張嘅表情。通常我地會搬出大大小小嘅理由耍開老闆,「忙緊另一單Urgent野啊,轉頭搞店即刻Send比你過目啦!」,「趕住出個Offer比人,個Candidate今晚飛啦」,

「過一過Account個邊拎返張Cheque先」,轉過頭佢有佢忙就唔記得你住。人始終唔係機械,會怕羞會尷尬嘛。不如嘗試相信下屬有獨立處事嘅能力,俾左指示,Set個Deadline,只要有疑問肯諗方法搵答案,咁大家都多咗時間空間專心做野。

不過一眾老油條係唔會照顧你咁多情感問題,佢地嘅經典語錄係︰做咩都係「為咗你好」,電腦係公家嘅,我係你老闆,唔通無資格望你喺電腦做咩?你唔可以光明正大俾人睇等於「身有屎」,更加要多啲Check住你,我係要睇啊,你可以點?教你係塞錢落你袋咋,仲唔快啲謝恩?老油條自己呢?行埋佢個位少少立即繃崩緊,電話收埋,縮細晒啲File鬼鬼祟祟,驚死你喺佢身上攞到料咁。阿東話齋︰「再盯實我電腦睇,我就一次過開幾十個File出黎,樣樣Show一半,起勢打字,睇你望得邊樣,捉唔到我路!我無玩野啊,咪Multi-task緊囉!」

圖:Shutterstock


以上文章刊於《招職》。