Career Advice 招職頭條

喜劇孖寶宣揚健康開心

開心,到底係簡單定困難?細路哥收到一件聖誕禮物已經又驚又喜,但人愈大,笑聲就好似離家出走般,久久都不回來一趟。今期訪問兩位熱衷喜劇表演的有心人,不如睇吓佢地點諗。

轉危為機 心態決定境界

聖誕佳節普世歡騰,讓人得以藉節日氣氛在煩囂中偷閒,享受與家人朋友共聚一堂的美好時光。今年由頭忙到落腳趾尾的藝人楊詩敏﹙蝦頭﹚演出機會愈來愈多,電視劇和綜藝節目邀約接二連三,然而忙到飛起的她仍然心繫舞台,年中就和身兼好拍檔、經理人、男友三重身分的邵子風 ( Dean ) 一同籌備喜劇《極品男女》。

「可惜因為場地問題而要延遲到明年2月先上演,不過又咁諗,變相多咗時間再深化內容和主題!」塞翁失馬,焉知非福,蝦頭坦承收到消息未能如期出演時實在失望透頂,幸而唔算樂天但思考正面的她很快就把情緒轉化為動力,除了立刻打無數電話向相關人士交待情況外,更與Dean齊心專注眼前的減磅事業,準備二人都要以最Fit姿態上舞台。

愈紅愈瘦、抑或是愈瘦愈紅?蝦頭笑著解釋其實減來減去全是為健康著想。「最後就發現想食嘢只係心癮嚟,而且減得有法的話完全唔辛苦。有時夜收工想食吓宵夜,與其死忍爛忍,不如揀樣健康清淡的食。」一個減字,年中折磨幾多少女中女,蝦頭提醒各位長期作戰講求持之以恆,偶爾心癮難耐食兩啖宵夜係唔使死的。至於在堅持的路途上,又有甚麼幸福得過有戰友兼男友相伴,而呢個人仲要係可以用短短三個月減走廿磅嗰種?

Dean隨即自嘲一句「去到呢啲年紀自不然會開始講求養生」,事實是這位即將回歸幕前的表演狂熱分子深深明白一點,身體健康才有能力達成更遠大的目標。「表演者應該以身作則去宣揚佢信奉的理念,我同蝦頭做喜劇係想開心健康地做,所以咪由自己開始做起!」

識感恩自然活得開心

一年話咁快就完,蝦頭有感而發,感恩今年得到不少人相助。「由舞台劇到電視劇,不知不覺就轉型咗三年,今年終於Feel到得心應手,如果冇之前累積下來的經驗,肯定唔會咁發到力。我始終想在香港發展喜劇,想組成專做喜劇的團隊,因此好感恩今年事業穩步上揚,有空間畀我發展專長,去籌備自己想做的事。」

蝦頭更形容今年是「籌備年」,盼望未來兩年可以大展拳腳,在舞台和電視雙線發展。她轉頭望著身兼三職的Dean,笑言一件想感謝但未必有人信的事:「我仲好感恩同佢鬧交!我哋愈鬧愈理解對方,愈鬧愈明白自己!」感情愈鬧愈好?係真唔係?

那麼只好講多一件旁人未必信但的確是真人真事、且在Facebook有片為證的「閃光彈」事件:前排Dean食魚哽骨在牙肉,出盡奶力都夾唔返出來,蝦頭雖然係講笑咁講,但又真係二話不說借出自己的玉手及指甲,點知一出手內應外合,九秒九成功夾返條魚骨出來;默契之深、情景之惹笑啜核,笑到同場所有人反艇!

情侶間小事化大唔一定是災難,將日常生活中的好笑和溫馨化大去睇,原來係幸福同肉麻到令人有少少妒忌。有一個甘去為你伸手夾魚骨的女朋友,而佢又即將生日,Dean係咪應該有啲表示?「唔好提了,每年呢個時候我都覺得好大壓力,聖誕喎、加埋生日喎!」各位做人男友老公的不妨想像一下兩個重大日子撞埋一齊到底是幸或不幸。

為人為到底,小記經已預先向蝦頭探定口風,Tips就係:蝦頭想要部Fujifilm相機影靚相。Dean,你識做啦!

 

 

文:Jie Leung

圖:K. Y. Cheng


以上文章刊於《招職》。