Career Advice How to Get Promoted

【辦公毒男手記】打工仔「才」不可露眼

財不可露眼,呢個道理,稍為有點人生經驗的人都應該唔會反對。但在職場,「才」不可露眼,卻未必人人認同。

別誤會,我並不是講那種「鋒芒畢露招人妒」的廉價人生哲理。講真,呢個爭上位爭崩頭的社會,不招人忌是庸才,邊驚得咁多?

我所講的是,有些與你職位、職級無關的「才能」,免得過就不要讓老闆和上司知道,最好連同事也守口如瓶。You know,同事往往是口疏的代名詞,唔覺意爆你響口,你都唔知嬲唔嬲佢好。

這個社會臥虎藏龍,好多人公餘之時都培養出三幾項技能,但聰明嘅通常不隨便張揚,正所謂「唔通我識如來神掌又同你講咩」。除非你好鍾意做免費勞工啦。

朋友Tommy就冇諗過呢點。他從事飲食業,工時長勞動強係人都知,呢啲唔在講。難為他竟能公餘練就一身攝影剪片技術,好衰唔衰被老闆知道,從此就變成公司的御用攝影師!

舉凡餐牌硬照、新菜式宣傳、對外廣告相,都由佢一手包辦。老闆最近仲迷上親身上陣做短片主角,自然又是Tommy操刀。

你可能以為,佢呢舖仲唔受重用,升職加薪?錯晒。呢啲和工作崗位無關的事務,公司係唔Count入考勤的。換言之,做就有你份做。加人工?冇!OT補水?冇!屋企用電腦剪片的電費也閣下自理。

老闆仲好自豪咁周圍同人講:我公司啲同事多才多藝,人人自願為公司奉獻,唔怕蝕底先至係好員工嘛。

Tommy老闆尚且會讚下佢。我同事Amy有次幫佢部門影相 ( 非份內事,她做會計 )。你知道,今時今日手機普及人人都是攝影大師,上司把Amy啲相彈到一文不值。做義工仲要俾人奚落侮辱,難為Amy曾攞過攝影比賽亞軍,搞到尊嚴都冇埋。