【寫靚份 CV】究極 CV 化妝術 | cpjobs
Home > Career Advice > How To Job Seek In Hong Kong > 【寫靚份 CV】究極 CV 化妝術

【寫靚份 CV】究極 CV 化妝術

Published on Wednesday, 25 Sep 2019

上期講咗寫靚份 CV 係幾咁重要,所謂顏值即正義,所以教咗點樣幫張 CV 揀啱字型,戰衣就揀好嘞,今期就講吓點樣排版(typography),化番個靚妝啦。

Download 個 template 咪得囉?

今時今日寫 CV,梗係冇人會再對住個空白嘅 Word file 慢慢揼啦,一定係 download template 㗎喎,咁有人就會覺得既然都有 template,啲排版呀、design 呀都唔駛自己操心㗎啦。

少年你太年輕嘞。係,個 template 本來係好靚仔嘅,但係當你將自己嘅資料 copy 晒落去個 template 果陣就唔係㗎啦。

首先撇除你將舊 file 嘅格式 overwrite 咗個 template 嘅格式呢種人為錯誤先(任何人用過 Word 做功課都經歷過撳個 backspace 就可以破壞成段格式嘅痛苦同無奈),最大問題係……

張 template 預啲位根本唔夠你填晒啲資料

呢個唔係你嘅錯,亦都唔係個 template 嘅錯,係 A4 紙嘅錯,點解 CV 要 print 落 A4 紙而唔係 A3 紙呢,唉……

咁你會點做?通常就係改字體大細囉、改吓張紙嘅 margin 囉,但係一改完呢兩樣嘢,成張 CV 個 layout 就變晒㗎啦,咁又要手動拉闊吓呢度、縮窄下果度咁啦,呢個時候你再對比下個 template 原本個樣?

又唔駛灰機嘅,其實只要避免啲常見嘅排版陷阱,跟下 best practices,咁張 CV 咪又靚仔番囉。

一份 CV 多種字型

新手村出嚟最常犯嘅錯誤就係以為越多字體越 fancy、越吸引到人睇,其實咁樣係好唔 pro,一睇就知係業餘(amateurish)。

乜都置中一餐

只有標題(headline)適合「置中」,內文就唔應該置中。

呢樣嘢同人嘅閱讀習慣有關,例如英文,係由左至右寫,閱讀嘅時候視線由左至右,移落下一行嘅最左邊,再睇到最右邊。

問題就喺呢度嘞,置中嘅話最左邊第一個字嘅位置每行都唔同,變相視線每次移去新一行都要去搜尋最左邊嘅位置,感覺就會好難讀。

左右對齊

傳統印刷品會喺行尾用 hyphen 嚟斷字,好似報紙咁,每行都可以左右對齊。

好可惜,Microsoft Word 嘅 default 係唔開 hyphenation 嘅。

如果唔斷字又夾硬要左右對齊,Word 會點處理呢?無可能將啲字整闊㗎,咁就唯有整闊 space 囉,明明一格闊嘅 space 可以變咗兩格闊,咁就會出現兩個問題:

密集恐懼症患者嘅剋星

好似你啲咁出色嘅求職者,無論嚮咩地方,都好似漆黑中嘅螢火蟲一樣,咁鮮明,咁出眾。雖然你係咁出色,但係人哋眼力有限,無論點你都唔好夾硬將你嘅威水史全部塞晒落去張兩頁紙嘅 CV 度吖。

我真係明,想突圍而出,個個都想有咁多嘢寫咁多嘢落去㗎啦,咁又話 CV 唔好寫多過兩頁,咁咪縮細啲字,字距窄啲,行距密啲囉,務求用盡所有空白位。

吊頸都要透吓氣啦,適當嘅留白可以帶出空間感,睇得舒服,HR 先有心機睇落去㗎,咁樣比「字海戰術」更加可以強調重點。

米上刻字

真人真事,有個中同好鍾意寫到啲字細細隻,細到好似喺米上刻字咁,佢就覺得好爽,我哋就覺得佢好變態,有人話應該係一種 OCD(obsessive-compulsive disorder, 俗稱強逼症),最得驚嘅係佢連考 DSE 都係咁做,我哋為改卷果位老師對眼默哀一分鐘……

當然老師改卷又唔可以話你啲字太細佢就減你分嘅,應該…… 但係如果你份 CV 啲字用到 10pt 或以下呢,HR 同事都未必會直接掉你份 CV 入去資源回收筒嘅,好人啲仲可能幫你放番大啲字體添,不過啲格式走唔走位就睇你嘅造化嘞。

Underline 唔是咁用的

多得偉大嘅 internet,underline 依家只可以用嚟表示 hyperlink。

你手寫筆記用 underline 間重點當然冇問題,因為你未必有瑩光筆,更加唔可能用粗體(bold)或者斜體(italic)啦,用咗都唔會覺眼。

喺非手寫文件用 underline 嚟間重點呢,其實係打字機時代遺留落嚟嘅,同樣係因為冇得用粗體或者斜體,所以唯有用 underline,換言之,呢個係技術條件限制之下嘅妥協(compromise),我哋依家其實有好多更好嘅強調重點嘅手段。

錯用斜體

講開斜體,其實唔係隻隻英文字體都有包斜體㗎,當然偉大嘅 Microsoft Word 係有辦法整斜任何字體啦,行內稱為「偽斜(faux italics)」, 咁有偽斜就有「偽粗(faux bold)」啦,原理係一樣。至於個結果靚唔靚仔就大家有眼睇嘅。

咁究竟隻字體係咪偽斜 / 偽粗呢?至少我哋介紹得俾你嘅 字型 就肯定有由字型設計師 design 過嘅專用斜體同粗體嘅。

另外要提吓,「斜體自古以來就是中文的禁地」。如果你張 CV 或者 Cover letter 要用漢字,千祈唔好用斜體啦。

三重、甚至四重強調

重要嘅嘢要講三次,咁講唔到三次果陣係咪要用三重方法嚟強調呢?

有人真係咁諗,所以就出現咗「粗體 + 斜體 + underline + 全大階 + 大字體」嘅終極五重強調法嘞,爭在未用瑩光色 highlight 埋㗎啫。

喂呀,唔好咁癲啦。

用埋紅色字,即刻有連登 post feel。

“引號用法”

開閂引號係用引述或者講反話用,唔係用嚟強調㗎,唔好再用錯啦。

To Enter or Not to Enter, There Is No Question

呢個世界有兩種 Word 嘅用家,一種係撳 Enter 嚟隔行,一種係唔用 Enter 嚟隔行。如果你係後一種,請稍移玉目,睇下一個 point;如果你係前一種,要改啦,乖。

Again,又係打字機果啲老餅嘢,要開新段,又想段與段之間隔得開少少,唯有撳多吓 Enter。咁你依家唔係用打字機呀嘛。

又,仲記唔記得以前用 Word 寫 paper 成日一撳 backspace 就搞爛咗成段嘅格式?Enter 就係其中一個原因啦。

咁,段與段之間想隔開啲要點做?睇下面嘅 Best practices 啦。

"直引號"

打字機以至鍵盤鍵數有限,所以開閂引號共用一個鍵,結果犠牲咗可讀性,試比較:

"It's Mary's CV."

“It’s Mary’s CV.”

句子後空兩格

又又又係偉大嘅打字機。打字機嘅設計係每個字母都係一樣闊,所以只可以用等寛字型(Monospaced type)。

但係個別英文字母,例如 i 同 l,因為本身好修長,同前後字母嘅距離睇落會闊咗;相反,w 和 m 因為本身好肥,前後字距喺視覺上又會窄咗。

所以以前教用打字機打字果陣要拍兩次 space,咁樣就可以區分開句子結尾嘅空格同每個字之間嘅空格。

依家絕大部份嘅文件都係用比例字型(Proportional type),每個字母會因為自身嘅形狀而有唔同嘅闊度,改善咗等寬字型嘅缺點,如果仲夾硬打兩個 space,反而令到段落入面出現礙眼嘅空白位。

都係果句啦,你唔係用緊打字機呀嘛。

Best practices

字體大小適中

依家啲網頁為咗要照顧喺手機閱讀嘅需要,內文字體一般都會設定喺 16pt 以上,但係 CV 主要喺電腦屏幕同列印出嚟睇,16pt 就太大嘞,視乎字型可以揀 12-14pt,除非你想幫同事驗眼,否則唔好再用 10pt 以下啦,唔該 orz

行高

行高即係同一段入面每行嘅高度,如果係 1 倍嘅話,幾乎就係行貼行,非常密,所以一般建議係字嘅 1.2 - 1.5 倍行高。

CV 本身有 layout 設計,空間感本身比較強,多字嘅部份(例如工作內容)可以密少少,1.2 倍都 OK。

Cover letter 基本上都係一個個段落,空間感較弱,可以多少少用 1.5 倍行高。

段距

段距即係段落之間嘅距離,上面提過,用 space 嚟分段係錯誤嘅做法,另一個原因就係更難控制段距。

段距嘅作用就係話俾讀者果度係段落之間嘅分界,唔可以太窄,設定建議係至少 1 倍行高。

標題前後段距(即係上下)唔應該設定到一樣,因為標題同上面段冇咩關係,而同下面跟住嘅段落近啲,因為關係更緊密。

所以設定應該係標題前留 1 倍行高,後面係 0。

邊界

邊界(margin)應該用 default,即係 1 吋,或者 2.54cm,有 style guide 甚至話左右 margin 要用 1.5 吋,如果你 Cover letter 寫唔到咁多嘢,填唔滿一版嘅話,可以試下用 1.5 吋嘅,否則跟番 default 就好。

短行

每行應該有 45-75 個字母,最理想係 66 個字母,當一個字有 5 個字母,咁一行就大概有 9-15 個字左右。 到達成呢個條件只需要兩個步驟:

  1. 睇番上面個條件,確認字體係咪 12-14pt。
  2. 一般正常嘅 template 都會用 multi-column layout,例如左邊 column 係年份月份,中間寫「工作內容」,右邊可能仲有個職位咁,每個 template 都有啲唔同,但係大同小異,點都唔會得一個 column,如果係嘅話,你最好揀過第二個 template 啦。萬一你寫完之後發覺一行超過 75 個字母,你可以係咁以改吓 column 嘅闊度。

靠左對齊

要避免左右對齊而出現嘅空白長河,有兩個方法:

  1. 啟動 hyphenation
  2. 靠左對齊

用 hyphen 斷開嘅字會比較難睇,所以一般會選擇靠左對齊,依家絕大多數網頁其實都係採用呢種設計。

“真・引號”

Word 其實會自動幫你轉番做靚仔嘅““真・引號”,所以通常直引號係嚟自 copy&paste 嘅內容。

解決方法其實好簡單,首先確認係咪真係有開到自動轉換:

之後再照以下步驟:

單引號

  1. Ctrl + h
  2. 喺「Find what」同「Replace with」分別輸入 ' 同 '

雙引號

  1. Ctrl + h
  2. 喺「Find what」同「Replace with」分別輸入 " 同 "

冇打錯字,你亦都冇睇錯,就係 A replaces A,B replaces B,但係 replace 果陣 Word 就會自動轉埋㗎啦。

 

表達重點的正確方法

上面嘅錯誤示範提到有五種強調嘅方法:

  1. 真・粗體
  2. 真・斜體
  3. 全大階
  4. 大字體

其實仲有用顏色,不過 HR 一般 print CV 都係用黑白 / 灰階,所以適合 CV 或者 Cover letter 用嘅就係以上呢 4 種嘞。

首先講內文,建議首選用斜體,其次係粗體同全大階,但係突出效果太強,非必要就唔好用嘞。大字體就留番連登巴打用。

標題就 4 種都可以用,但係每個標題用兩個方法例如

Headline 1: bold + Font size

Headline 2: ALL CAPS + Font size

Headline 3: Italics + Font size

唔同層級嘅標題應該有大細嘅分別,再加多一種方法,咁樣大細標題嘅層級關係就會更加一目了然。

啟動連字

某啲字母組合會令到兩個字母重疊,例如:

啟動咗連字(Ligature)嘅話呢啲字母組合都會連埋一齊,而唔係黐埋一齊。

字距優化(Kerning)

某啲字母因為型狀嘅關係,同其他字母之間嘅距離睇落會大咗或者細咗,例如:


WAV 每個字母之間嘅距離視覺上比 E 同 S 大,感覺唔 balance。 比較極端嘅例子好似 Kerning 呢個字咁,r 同 n 如果黐得好埋嘅話就會似 Keming。

數字遊戲

數字原來都有好多重,唔係講緊阿拉伯數目字同羅馬數目字,而係:

  1. 比例數字(Proportional figures)
  2. 表格數字(Tabular figures)
  3. 齊線數字(Lining figures)
  4. 古風數字(Old-stlye figures)

最簡單就用功能嚟分類:

  1. 標題 = 比例 + 齊線數字
  2. 內文 = 比例 + 古風數字
  3. 表格 = 表格 + 齊線數字

Checklist

我哋準備咗張 checklist,方便你 send CV 之前做最後檢查,去 cpjobs Facebook fan page 留言就會有 download link 㗎啦。

Become our fans