【職場航行日誌】不過是個小小兵 | cpjobs.com
Home > Career Advice > 名家分享 > 【職場航行日誌】不過是個小小兵

【職場航行日誌】不過是個小小兵

Published on Friday, 31 Jul 2015

《壞蛋獎門人》入面既黃色小小兵,最近擔正《迷你兵團》紅遍全球,小妹好奇樣子騎呢可笑既佢地究竟有咩過人之處,可以咁受歡迎嘅呢?

 

趁住電視上嘅重播,第一次睇《壞蛋獎門人》,呢一群嘅小小兵一直跟隨壞事做盡嘅Big boss,即使為Big boss偷得價值連城嘅寶物,明知無任何獎勵,依然心甘命抵留喺佢身邊工作,甚至寓工作於娛樂。論論盡盡嘅佢其實好清楚自己嘅能力,單獨行動係永遠無可能順利完成任務,所以從來無意思去爭名奪利,只會安守本分聽柯打真誠做野。見到唔識大嘅佢地,諗起初出茅廬時嘅自己,未知道職場有幾邪惡,未見識過呢個世界有幾複雜,未體會到自己有幾渺小。

新一輪Fresh grad.搵工潮又開始啦。Scan CV時見到唔少大學生申請一份普通做文職既Assistant位,Expected salary竟然係18K以上,遠超出我預期。再睇睇究竟佢地係咪之前有Internship或者相關嘅兼職經驗,無!反而見寫得最多嘅係參加過唔少交流團。自問讀書時候我都肉赤地俾過一筆錢去學校搞嘅五日交流團,飲飲食食遠多過真正學習時間,所以對我黎講不過係一趟短Trip,最多只係話俾我知你唔係一個完全內向嘅人,唔洗擔心你嘅Social skill,係得咁多。即使係名牌大學畢業,零經驗嘅話,係公營機構黎講起步點係一樣,絕對唔會因為你成績表多一兩個A而考慮加多你一、兩千蚊人工。唔好幻想,緊記踏實。

搵工通常係漁翁撒網,每一次按Submit掣或者寄出履歷前,請務必金晴火眼睇清楚對方嘅要求。考究呢啲小意思就睇得出你夠唔夠心思細密,就好似公營機構嘅工咁,為咗招請到人才,多數有Increment嘅制度,你有料嘅儘管明知某個職位嘅起薪點幾多都會寫高Expected salary,想請你嘅點都同你度掂佢!然而Fresh grad切忌心頭高,你以為自己值呢個價,睇果個只係覺得你不自量力,或者根本無去Check吓究竟而家市場係咩價位。

就算俾你入左去做,你可能會幻想身邊會有Buddy教你幫你,點知咩都一腳踢。唔識?自己諗辦法搞掂佢啦!當現實同所憧憬差距太大時走去不停轉工又轉工,最後谷鬼氣咩都賺唔到,抖返一排再搵新工面試個陣,又俾HR寸︰「你都幾Jumpy架喎,我地公司唔希望請個人返嚟好快又走。」所以謙卑一啲硬著頭皮至少做一次小小兵,工作能力可以晚晚加班練成最強武器,之但係初來報到點先可以避開暗箭真係學到野?緊記保持低調。

有功俾上司去領,有錯自己爭住去認,有著數俾同事攞晒先。唔鍾意咁?職場就係玩緊呢種遊戲,初哥係No say,趁住呢個時間擘大雙眼認清所有假面孔,當你開始識得同人打交道,明白到對待自己做過既兵仔同老油條要用咩唔同腔調,到時你就自然光榮地脫離小小兵行列。再轉職時一定有顯著進步,面對唔同場合應付自如,去到邊都得人鍾意,呢種高招先係一生受用。

 


 

Become our fans