【職場航行日誌】交出無限Draft | cpjobs.com
Home > Career Advice > 名家分享 > 【職場航行日誌】交出無限Draft

【職場航行日誌】交出無限Draft

Published on Friday, 14 Aug 2015
圖:AP

Draft係唔少白領一族一樣好放心既工具,Draft email啦、Draft minutes啦,Draft letter啦,做完俾阿頭慢慢核對,執番好啲Format或者改番正啲Careless mistake,將出錯機率降到最低先出街,隔左一層實無死啦。但係你知唔知,份Draft做得唔好,呢份安心隨時會俾人拎黎做攻擊你既最強武器。

 

跟過幾個「掃把」,佢地對下屬既Draft work有兩種做法。最常見係魔鬼既手段,就係將你交出黎既Draft,無論係你唔小心打錯咗野既,抑或係阿頭即興叫你改野既都好,一一連同要簽名既文件,夾埋係當眼位置,呈上去俾經理鑑賞。原因?就係要俾主子知道佢因為你而Workload重左囉!主子見到咁多Draft,當下只會以為係你翻來覆去咁改份文件,背後既原因,得你自己知。然而,係佢心目中勞苦功高既,永遠無你份。

善良既處理方法最得人心,就係咀嚼完你既Draft後,攤出嚟同你了解番出錯原因,長氣少少講下建議既改善做法,然後叫你好好Keep起嚟做Reference,下次做同類文件時就可以提醒自己唔好再犯同樣錯誤。當一個忙到甩轆既阿頭肯花心機時間「研究」你既小毛病,你唔多唔少都會覺得唔好意思,自自然會醒水做好啲!良性循環之下,你做得安心,阿頭又見到你進步,係一幅幾咁美好既畫面。

可惜好人難做,亦係職場買少見少,就好似一班就嚟退休既老油條,一定會格外小心臨走前唔好搞壞自己個名,有咩事搵細既開刀,自己盡量避之則吉。聽聞有位同事試過因為咁差啲過唔到試用期,佢阿頭有舖改Template癮,加啲「The」或「That」,有時啲Formatting又突然話加闊個簽名位,新同事改完又改,無奈地睇住又一疊Draft呈上。有次經理簽完文件俾番個同事時,順帶講咗句:「你都就過試用期,做咩事成日整錯文件,呢一堆Draft你得閒自己睇番啦,一封信搞咁耐先出到街。你有唔識要多啲出聲問美姐先得架嘛,知唔知啊?」後來開咗一次大會,其他Team既阿頭提出而家Template唔一致,經常各自加減咗啲字句搞到啲細既唔識Case by case咁跟,經理先了解到原來有呢個問題,亦間接拯救咗新同事。

曾經,想為自己平反,但係明知就算講出嚟都係對佢不痛不癢,完全唔會動搖到佢地位。唔可以正面還擊既話,旁敲側擊係好方法。將你心入面既鬱結講俾信任既人知,包括平時有兩句既茶水姐姐,一傳開去你身邊既人自然收到風。如果你講既係事實,而佢地一向已經聽唔少你阿頭自私既處事作風既話,會記係心度,未必會即時幫你,但係可能有朝一日為你出手。

 


 

Become our fans