【職場航行日誌】藏在耳筒的 另一個世界 | cpjobs.com
Home > Career Advice > 名家分享 > 【職場航行日誌】藏在耳筒的 另一個世界

【職場航行日誌】藏在耳筒的 另一個世界

Published on Friday, 28 Aug 2015

男友話,佢地做後期製作嘅,平時喺Office開住收音機,又或者自己戴耳筒聽住歌工作,真係好羨慕。男友係一個鍾意吸收資訊嘅人,經常一邊聽住網台一邊做Design,充分利用時間之餘,又可以做吓私人野,令到返工唔再係一個只係忙到行屍走肉嘅地方。

 

「你嗰行就梗係無咩所謂啦,唔使接電話又唔使對客,我地戴耳筒唔方便做野,同埋阿頭都唔俾啦……」我以為男友唔理解我地做文職嘅掣肘,「邊有人叫你戴晒兩邊耳仔聽野?戴一邊聽到就夠,而家咩年代,日日淨係對住部電腦不停輪迥Standard嘅Template,好快就同社會脫節。 」聽身邊係MNC工作既朋友講,佢地嘅老闆唔使見客時都係經常戴住個耳筒,所以下屬照辦煮碗,完全無問題,仲話我知覺得大家多咗時間專注聽野,好似連是是非非都聽唔到。

呢一種習慣應該慢慢潛移默化開去,特別係香港能幹嘅打工仔,聽住耳筒既同時工作上依然發揮得好,用行動表示佢地值得去享有呢個少少嘅娛樂福利。喺壓力大嘅競爭環境下,有時躲係耳筒既世界放鬆一下,回神做野既時候更有效率同積極。聽下MIDI平靜吓情緒,聽吓電台啲好笑花生節目,聽吓網台接收新資訊。用得其所嘅話,對員工同公司係會出乎意料咁好。

不過我地部門就有兩位男同事做壞規矩,由於佢地專責執相、設計Video片頭片尾同埋做一啲簡單嘅Graphic design,成日需要聽聲改效果,幾乎由返工到收工都塞住對耳仔。佢地戴住耳筒個時好似與世隔絕咗咁,連放喺枱頭嘅電話邊響邊閃紅燈都零反應,搞到身邊嘅同事煩厭地一而再,再而三走埋去叫佢地聽,「大佬,我係佢秘書啊?聽電話都係佢地工作一部分嚟㗎喎!」,除非用緊貴價嘅入耳式耳筒,又或者開到震耳欲聾嘅聲響,否則我真係好懷疑,係咪誇張到可以將外面電話聲同人聲完全掩蓋晒?抑或係人前扮忙扮聾可以做少啲?

有次真係不得了,老闆好Urgent想搵佢地喺張團體相度加啲祝賀字句送俾個客,急步行過去時已經遠遠嗌住佢地,我地周圍既人都抬高頭八卦下咩事,佢地依然你有你講,我有我聽,企到身後叫都係無補於事。老闆忍住道氣輕輕拍一拍手臂,佢地即刻好似鬼上身咁打咗個大冷震,悔氣咁講左句「咩事啊!」一擰轉頭見到老闆個急樣,心知不妙!恭恭敬敬咁改口問︰「老闆,有咩幫到你啊?」好典型咁示範左點樣將本來有用嘅工具成為咗自己嘅障礙。勿論過於專注聽緊啲咩,老闆嘅說話先係要第一時間聽到啊!

 


 

Become our fans