【職場航行日誌】鍊成強大內心 就可百毒不侵 | cpjobs.com
Home > Career Advice > 名家分享 > 【職場航行日誌】鍊成強大內心 就可百毒不侵

【職場航行日誌】鍊成強大內心 就可百毒不侵

Published on Friday, 29 Jul 2016

一舉手一投足,除咗香氣之外,散發住一種懾人嘅貴氣,無番十幾廿年嘅功架係無辦法咁自然流露到俾我地睇。跟著呢位女強人嘅下屬,都一致推舉呢位幾乎無可挑剔嘅好上司,平時賞罰分明,說話客氣得嚟好溫柔,又會因應下屬嘅優缺點俾好多Exposure機會。永遠將好野留為己用唔係佢Style,佢係會真心為下屬嘅前途著想。唔單止,同事仔生日,連埋節日每次都不忘送上小禮物加一張親手寫嘅心意卡,逗緊十幾萬人工嘅高級經理願意咁「紆尊降貴」去表達善意,對同事嚟講真係執到寶。

而喺對外方面,由於交際手腕強,工作方面就事半功倍既兼好易就有天文台自動報料。上司嘅上司都好睇得起佢嘅工作能力,由草擬信件、講稿、通告,準備Presentation資料,同各個部門嘅阿Head傾Manpower和制訂年度預算目標,到自己一手一腳Hold functions和管理幾條HR team等。咁繁重嘅Workload點會無打沉過佢?不過佢願意講出聲,亦諗方法去盡用同事嘅長短令到件事行得快啲有效率啲,得到好多人嘅支持,所以佢係一個幾唔錯嘅仿傚對象。

而如何鍊成強大嘅內心,就係先從別人嘅內心著手。坐到咁高位,下面奉承嘅人多不勝數,係咪唔多唔少會造成啲港女同公主脾氣?而佢,真係唔覺有。佢鍾意稱呼下屬做「阿仔」、「阿囡」,主動拉近大家關係融洽啲,更方便做野。下屬個心自在咗,想喺好老闆面前「搏表現」嘅諗法亦會大大提高,因為佢地知道付出咗,除咗白紙黑字記錄喺Appraisal上面,最緊要係會有人記喺心,而唔係粒聲唔出利用完人仲自己領埋功。

佢作為兩子之母,一直對自己嘅言行好謹慎,怕小朋友有樣學樣,所以極少見到佢會狂躁發脾氣,最多黑面一陣咁多啦!平時呢啲時候,係無人夠膽騷擾老闆,不過正正因為佢平時種下嘅愛心實在太多,本來係競爭對手嘅高層同事都會忍唔住主動關心。高層嘅野好多時心照唔使講到咁明,最驟忌係匿埋一邊死做爛做無人知,肯拍下膊頭聽對方呻兩句已經好足夠。連同事嘅心都贏到,只因佢都係個義氣仔女,頂頭大佬有野安排唔妥當或者出現不公,佢係會心口掛住個勇字行出黎同大家去一齊開放自己嘅感受。係嘅,可能係因為佢無咩經濟負擔,唔怕無咗份工先夠膽咁做。之但係呢個社會大把賺錢買花帶嘅人,係會選擇匿喺自己細小安逸嘅世界就算,理得你出面打緊仗!

職場好現實嘅,就算已經上到神枱,都唔會永遠有把握控制好所有人和事。一有難纏嘅Case就見真章,一係被「揹鑊」走人,一係扭盡六壬出盡法寶去整熄火頭。唔好以為領咗功叻叻豬就可以安樂坐到退休,周邊妒忌嘅小人可能會蠢蠢欲動出嚟搞搞震,你愈坐得高其實愈頭痕。

做人做事先要努力培養獨立嘅思考,唔好輕易被對手同老闆動搖,對下屬多一啲了解,佢地嘅愛戴分分鐘喺危急關頭助你一把,喺未有事先諗定Plan A、B、C,如果到最後都唔如願發現唔係想行嘅路,或者放手一搏反而搵到出路,Who knows?保護自己最強嘅武器就係壯大內心,釋放出與眾不同嘅氣場,有妖氣埋身?未驚過!

圖:Shutterstock


以上文章刊於《招職》。

Become our fans