【辦公毒男手記】老闆最後一刻至唔收貨 | cpjobs
Home > Career Advice > 打工仔職場故事 - 名家分享 > 【辦公毒男手記】老闆最後一刻至唔收貨

【辦公毒男手記】老闆最後一刻至唔收貨

Published on Tuesday, 12 Mar 2019

出嚟打工,小至一份文件大至一個大Project,想老闆點頭一Take過,除非閣下天生骨骼精奇仲識如來神掌,否則真係有如在香港買樓咁艱難。

老闆唔收貨,平常不過;一單嘢改九萬幾次,亦不算甚麼。不過,腦細啊腦細,你可唔可以,唔好,每次都,去到最後一刻,埋門一腳,如箭在弦,全世界等住射門那Moment,才黑面「踢橋」推倒重來呢?

你可能以為:你班人辦事不力得過且過馬虎求其,老闆才下聖旨重做啫!如果成品似模似樣,你估佢好得閒咩,係都要推倒重來才安樂!

留意返:如果100分為滿分,成績出來得50分,重做極度合理。成績有80分,基於盡善盡美原則,要「優化」亦無可厚非。但若然人人都認為成績已有98分,硬要拔尖到99分、100分,是否做得到是一個問題,是否合乎成本效益又是另一個問題。

你或者又駁我:你班大帝自認有95分啫,其實別人看來可能只有70分。懶就懶啦搵藉口!

留意返:好多時候,整個過程皆有各級「老頂」重重審批,有時候老闆也有參與批示,若說這樣也只得70分,老闆也有責任。

你再反駁:老闆完美主義精益求精啫,佢有乜嘢錯?

留意返:沒人反對他精益求精,沒人不讓他修改 ( 其實也不容下屬反對 )。大家反感的是為甚麼總要「搞到最尾最尾」才改改改?再者,有一個現象好常見:老闆們最後改為採納某個早被Banned的版本,而那版本是他自己否決的!當然,沒人夠膽寸他:腦細,又係你自己之前話唔好咁嘅?

你繼續駁:作為一個高瞻遠矚的企業家係咁架啦!喬布斯都出名喜歡改來改去。適應唔到咪另謀高就囉。

法官大人,小弟無補充,只想仿傚高官名言:你見過喬布斯未?我見過,我真係見過!睇電視嗰陣。

真相是:其實老闆都唔知自己想點。

 


以上文章刊於《招職》。

Become our fans