Career Advice How to Get Promoted

【辦公毒男手記】職場兩難:問又死,唔問又死

老闆或上司,通常都鍾意下屬匯報工作進度。

留意返,事情順順利利的,叫匯報;事情不順不利的,叫哭訴。你老闆係咁覺得。

冇人鍾意煩,老闆亦都一樣。所以,好多打工仔選擇報喜不報憂,唔係無理由。

這樣做當然有風險:問題最終解決了,那自然上上大吉:但萬一搞唔掂,過程中下屬又唔聲唔聲,結果可以好嚴重。

好喇,當Project出現問題,閣下衡量過自行解決不來,又或者孭唔起責任,咁你就踏入職場人生交叉點:問唔問老闆好呢?

嗱,公司請你返來,是解決問題,不是製造問題的。你老闆係咁覺得。

問題係,你一問佢問題,立即變成「製造」問題。因為,這一刻,等同叫「腦細」用腦;通常有八至九成機會,佢會進入惱羞成怒的狀態。

「你有冇帶腦返工㗎,咁都要問?」

「咁簡單都要問,你係咪想侮辱我智慧?定係你笑我有智慧根本唔應該請你?」

「你個腦生喺屎忽度,但你老豆生仔無屎忽,所以你又無屎忽又無腦!」

幾難聽都有,再難聽都有。上述對白,唔係抄愛回家大小姐㗎。如果你覺得誇張,恭喜你,你有一個至少叫有涵養的老闆╱上司。

為免被人話只識抱怨和Complain,關於這種職場兩難,我嘅建議係:問!被人寸死都要問!

因為,你唔問,出了事,屆時一樣有大量難聽的說話比你聽。

隨時唔止問候你,仲問候埋你家人。

更重要的是:自把自為仲出了鑊,因住人∼頭∼落∼地∼

至於被人插,子華神話齋,你份人工包埋的。忍下啦巴絲打。