Career Advice Tips to be more productive

你放工係咪真放工?

大部分打工仔都有一個辦公時間,朝早9點至下午6點,朝早10點至下午7點⋯⋯至少份合約係咁寫。打工仔每日由返工一刻開始就期待住收工嘅一刻,未坐低已經同隔離位講:「好想快啲收工返屋企。」段估隔離位都會和應一句「我都係呀。」如果佢話:「我真係好鍾意返工呀。」佢腦細胞可能開始出現咗啲問題。

小鳳妹同大家一樣每日都好期待收工,但後來有一日佢連攪咩叫收工都攪唔清楚。小鳳妹喺一間外資名店做前線Sales做咗四、五年,由於表現出色,所以得到公司提拔,早兩個月前公司話升佢職,叫佢去Office幫手。小鳳妹做咗前線一段日子,一直都心郁郁想試下做office,因為做Sales每日返工放工唔定時,成日要睇更表做人,但做office就唔同,朝九晚六,星期六日仲可以留返嚟陪下屋企人,於是決意一試。

但世事又點會盡如人意?小鳳妹去到office,職位係負責做Sales Admin.,即係做下Sales Report、支援下前線嘅銷售同事咁。不過,佢好快發現事實並非如此,佢名義上係支援前線,但實際上原來係支援老細居多。

小鳳妹呢個職位係要直接report畀Sales Director,平時除咗支援前線同事之外,原來仲要貼身照顧佢老細嘅大小私人事務,再加上老細做嘢極有幹勁,全部要求都又急又快,覆遲一陣都有說話聽。小鳳妹每日返工除咗要應付各式各樣繁瑣工作之外,放工後仲要應付佢老細嘅奪命煩音。小鳳妹每日壓力都好大,就算收工有朋友send短訊畀佢都唔敢開Whatsapp,因為怕畀老細見到佢上線,催佢幫手做嘢。

小鳳妹做咗office兩個月,名義上返工時間穩定,但原來工作時間仲長過做前線,比以前做得更加辛苦。以前放工就真係放工,但而家根本冇放工時間。結果佢更加懷念以前嘅工作,寧願返去前線做嘢,起碼放工都仲會有私人時間。

相信香港好多人都同小鳳妹一樣,放咗工都唔係真放工,或者根本唔知有冇收過工,以下呢啲情況不停咁輪迴:

1.收咗工都不停收短訊

只怪今時今日電話太方便,老細、客人、合作嘅公司隨時可以搵到你,每日都有用返Nokia 3310嘅衝動。

2.成日諗住工作攪到失眠

正所謂日有所思夜有所夢,瞓覺仲要諗住聽日返工啲嘢,結果經常眼光光到天光。

3.瞓覺唔敢熄電話

瞓覺係人生嘅基本權利,但你已經連呢個權利都桿衛唔到。瞓覺唔敢熄電話,因為驚老細隨時搵你搵唔到。

4.發夢都夢到公司嘅工作

難得瞓著但夢境都畀老細乘虛而入,從此晚晚惡夢纏身,日日起身冇精神。

Steve Jobs講過:「 如果今日係我生命最後一天,我係咪想要做我今日要做嘅事情?而每當答案連續太多日都係唔係,我知道我需要改變。 」如果你嘅工作係放咗工都唔係真放工,而你一啲都唔enjoy嘅,自己諗諗。