你有幾鍾意你老細? | cpjobs.com
Home > Career Advice > How To Get Promoted > 你有幾鍾意你老細?

你有幾鍾意你老細?

Published on Thursday, 04 Jan 2018

你有老細我有老細,你同我老細都可能有個老細要服侍。講到自己老細,有人可能會著曬火咁粗口橫飛,相反,亦可能有人會露出一絲溫暖嘅笑容,大談自己老細嘅可愛之處。但係老細係一種非常複習嘅生物,有時會討人歡喜,有時又會令人想除之而後快,遊走於愛與恨嘅邊界。要知道自己其實鍾唔鍾意自己老細其實好簡單,問一問自己以下幾條問題,選A的請加一分,選B的0分。

1.佢放假你會......?

老細日理萬機,好多時連假都唔會有時間放。平時老細日日都喺公司指指點點,你印都未影完又叫你去隔離幫佢攞文件;未打完個email 又叫你覆人email。你連飲啖水、去個廁所嘅時間都需要經過精密嘅計算,就快連呼吸都變得奢侈。點知有一日,你突然收到個消息,十年冇去過旅行嘅老細,竟然突然間打算去個長途旅行,兩個星期唔喺公司,呢個時候你嘅心態會係:

A. 老細一路以嚟都辛苦喇!佢唔喺度坐鎮嘅日子就係我報答佢知遇之恩嘅時候,等咗十年,我終於等到喇!

B. 哇!等咗十年呀!呢個機會我等咗十年,老細終於放假。我終於可以好好享受一下,鍾意去廁所就去廁所、飲水就飲水,係自由嘅空氣呀!

2.當老細受氣,你會......?

老細都有老細,佢捽你時,佢一樣會畀人捽。呢日你見到你老細畀佢老細捉咗入房,然後你聽到你老細喺房入面畀人大聲訓話。過咗成個鐘之後,你老細先一臉死灰咁行返出嚟。作為佢下屬嘅你,你會點諗呢?

A. 唉......一日都係我地呢啲做細嘅辦事不力,攪到老細要畀大老細鬧。大老細都癲癲地嘅,有時咪慢慢講囉,駛乜大大聲鬧。等老細冷靜下之後,等我去同佢傾下計安慰下佢先。

B. 哼哼!你都有今日!平時喺我面前就係威係世,今日變成過街老鼠,抵你有今日。佢畀人話完心情一定勁差,無咩事都係唔好攪佢。

3.放工你想唔想見到你老細......?

喺辦公室,老細永遠係上級,鍾意又好唔鍾意又好,你都要同佢講嘢、幫佢做嘢。同佢離開公司範圍,最多都係出去做嘢或者去公司旅行。呢日有同事突然發起一個活動,打算嚟緊個星期日約埋成班同事去BBQ。當大家喺度討論會唔會邀請你老細一齊去嘅時候,你會選擇投支持定反對票?

A.支持!大大力支持!我老細平時都待我不薄,雖然做起嘢上嚟係好認真,但係佢都對我幾好,又冇乜架子,放咗工嘅佢應該幾好玩。

B. 梗係唔好啦!你只用了千分之一秒就可以作出呢個決定。叫埋佢?唔好玩啦!平時對住佢咁耐都唔夠咩?放假仲要見到佢我情願唔去,等間佢同我講公事咁點算呢?

如果你老細攞曬3分,咁就恭喜你有個得你鍾意嘅老細。如果0分嘅話,我諗佢都要好好檢討下喇⋯⋯

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans