公司總有惡魔在身邊 | cpjobs
Home > Career Advice > Career Guidance And Counselling > 公司總有惡魔在身邊

公司總有惡魔在身邊

Published on Monday, 09 Apr 2018
N年前台劇話「惡魔在身邊」,如果呢個世界真係有有惡魔,佢未必在身邊,但就一定喺公司。喺辦公室充滿壓力嘅環境,令人類情緒容易失控;對自身利益嘅慾望,令人容易心生邪念,辦公室絕對係最適合惡魔棲身嘅地方。
 
大家每日喺辦公室入面工作都會遇上各式各樣嘅惡魔,佢可能以你老細嘅姿態出現,亦可能係日日坐喺你隔離個同事,目的就係挑戰你EQ嘅底線,令你有朝一日魔鬼付身,成為佢地嘅一份子。喺妖氣沖天嘅辦公室入面,惡魔以多種形態出沒,最常見嘅有以下呢幾種:
 
1.催狂魔
 
催狂魔最鍾意附喺啲老細身上,因為佢地興趣係催逼人。特別變態嘅會將條deadline定得勁近,然後無理地要求你deadline前交功課。最狂嘅催狂魔,可以係呢分鐘要份文件,下分鐘就要放喺佢枱面。交唔到?隨時血都畀佢吸乾。催狂魔亦都可以附身喺一啲唔理他人感受嘅同事身上。例如啲嘢明明本身唔趕,但一直拖到最後一刻先交畀人,令人地唔夠時間做之餘,仲要喺咁催迫人。喺香港呢個節奏急速嘅社會,催狂魔係其中一種最橫行霸道嘅惡魔。
 
2.負面魔
 
如果你發現喺辦公室裡面,身邊有隻負面魔,請你盡快避之則吉。要辨認出負面魔一啲都唔難,因為每次見到佢地都係面如死灰,唉聲嘆氣。「唉,呢個世界係咁㗎喇,我可以點吖?」「我做得幾好都冇人會睇到㗎啦,都唔會有職升㗎啦,求其咪得囉⋯⋯」負能量纏身慘過貞子纏身,隨時永不超生,成世都係咁。唔想畀佢拉入負能量嘅地獄,大家一定要遠離佢地。
 
3.口賤魔
 
廣東話有一句係話:「把口臭過坑渠」攞嚟形容口賤魔就最貼切。口賤魔把口講嘢不留餘地,鬧人完全不留半分薄面。最常見都係附身喺一啲老細身上,特別係一啲壓力好大,需要搵人發洩嘅老細。佢地講嘢唔會理人感受,鬧人鬧到喊係等閒事。有佢地存在喺辦公室入面,氣氛經常維持喺冰點,了無生氣,士氣低落,所有員工都想逃離呢個地獄。
 
4.卸膊狂魔
 
要選辦公室入面「最想除之而後快嘅惡魔」,卸膊狂魔絕對係數一數二,皆因佢地將自己嘅責任卸畀其他人,令自己可以置身事外。被卸膊狂魔卸膊嘅人會感到極度委屈,如果被上司卸膊,有冤無路訴,更加可能會心理唔平衡。對付卸膊狂魔一定要事前做足準備,用白紙黑字保障自己,以免畀佢有機可乘。
 
5.呀豬魔
 
正所謂唔怕神一樣嘅對手,最怕豬一樣嘅隊友。人類嘅惰性催生咗一種惡魔叫呀豬魔,被呀豬魔附身嘅同事會極之懶散,工作效率奇低。你踢佢一腳先識郁一郁,唔識得自動自覺去做嘢。呀豬魔絕對可以拖累成條Team嘅運作,容忍並唔能夠解決問題,喺適當嘅遁遁善後仍然冇改善,就喺時候用強硬少少嘅手段。
HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans