工作證明有行規 | cpjobs.com
Home > Career Advice > How To Find A New Job > 工作證明有行規

工作證明有行規

Published on Wednesday, 12 Jul 2017

HR日常其中一個「職務」,就係日日都出緊唔知幾多份工作證明畀啲離職同事。講到出工作證明,我地一定要出得靚靚仔仔,除左人地要拎去見工之餘,其他公司見到份工作證明岩岩巉巉仲會影響埋公司形象。
 
工作證明除咗要格式整整齊齊、冇錯字、冇錯文法之外,查實仲有一個好重要嘅地方就係離職原因。HR有一個行規,如果個staff係正正常常辭職,喺工作證明都一定會寫明個離職原因。如果係辭職嘅,我地會寫自動離職(resign of his/her own accord);如果係裁員,會寫明係redundancy;合約完結會寫contract complete,意思即係話畀其他公司嘅同行知,呢個人係喺正常情況下離職,唔係畀人炒。但如果冇寫清楚,HR一睇就會懷疑呢個人會唔會係有問題而畀人炒。所以如果個同事係正正常常離職,但又冇喺工作證明寫清楚個原因,分分鐘會影響到佢搵工。不過當然,我地唔會淨係因為呢句嘢而下判斷,最後都要睇埋面試同reference  check(工作背景審查)嘅結果。
 
工作證明只係簡簡單單一封文件,但對每個人嘅職業生涯都好重要。試過聽過有啲公司出工作證明慢吞吞,話出封信要成個月。咁樣唔單止影響到人地搵工,仲攪到我地呢啲HR薯仔係咁追。幫幫手,快快手手出份靚仔嘅工作證明,除左係HR責任之餘,仲可以幫到同行畀老細捽少幾次呀。

 

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans