今屆俄羅斯世界盃完滿落幕，大熱嘅法國順利取得冠軍，今屆世界盃播放時間都算Hong Kong Friendly，唔介意做幾朝喪屍就可以欣賞整屆賽事。呢屆世界盃引起唔少話題，當中有啲如果應用喺辦公室，都可能係有今生冇來世嘅大道理。
1.尼馬翻滾非上策
呢屆世界盃令大家笑得最開心嘅莫過於「尼馬翻滾」。尼馬利用奧斯卡級演技，將痛楚由內至外，再由外去返內咁演繹出嚟，務求得到球證同情，令對手被罰。不過，尼馬好似唔記得咗今屆世界盃已經引入咗VAR，佢冇再咁容易得逞，反而佢嘅精湛演技被無限放大，成為擴大網民取笑嘅對象。從此球證對尼馬翻滾習以為常，就算佢被侵犯都唔會咁易吹罰。喺辦公室入面都一樣，扮可憐博同情嘅情況時有發生，不過事實終有一日會被揭破，結局就會好似狼來了嘅故事一樣。
2.穿10號不算甚麼
喺足球世界入面，10號球衣象徵住球隊嘅靈魂。馬勒當拿、巴治奧、施丹、美斯等球星都係10號球衣嘅擁有者。雖然傳統係咁，不過未必著起件10號就一定係最勁嗰個。今屆最為人詬病嘅10號仔係英格蘭嘅史達寧，直到季軍戰都被領隊半場換出，網民都話佢配唔上10號球衣。喺公司入面，可能有啲人得到老細重用，但唔代表實力一定好強，我地只要繼續磨練自己嘅實力，總有機會搵到自己嘅出場機會。
3.精英不敵團隊
葡萄牙嘅C朗拿度、阿根廷嘅美斯16強止步，當今球王喺呢屆世界盃都黯然失色。精英主義喺今時今日嘅足球體系入面變得冇咁重要，好球員都敵不過好團隊。一個人得一對手，咩都認為自己一個人攪得掂係不切實際。喺公司入面冇好嘅團隊配合，實力幾強都可能徒勞無功。
4.鬥到最後一刻
今屆世界盃有好幾個90分鐘後補時階段嘅入球，進入到16強淘汰賽階段，有四場賽事要去到加時先分到勝負。球員喺世界盃嘅拼勁好值得應用喺工作上，唔拼到最後一刻都唔知會唔會成功。
5.以弱勝強不是夢
今屆世界盃好多強隊都喺大熱嘅情況下倒灶，例如西班牙輸畀俄羅斯、巴西輸畀比利時，雖然牌面比較強，但上到場都係五五波，最後甚至爆冷成功。上場前唔好睇少自己，凡事做足準備，就算人地經驗比你豐富，學歷比你高，只要唔好睇小自己就一定有機會突圍而出。
