情與義,別貪心 | cpjobs

情與義,別貪心

Published on Monday, 30 Apr 2018

辭職有好多因素,例如老細卸膊,監生屈你食死貓,不時捉你入房發洩,又可以係環境問題,例如有返工無放工,同事唔夾玩辦公室迫害,又或者你好有幹勁想做一番大事,點知全公司嘅氣氛係懶懶閒踢都唔郁,搞到你好無癮。

遇上呢類情況,下定決心辭職係件非常容易嘅事,哪怕由舊地獄跳入新地獄,只要搵到新工,辭職信一遞,兩袖一揮,毅然離去,又再展開新一頁。

但其實辭職呢個決定往往可以令人好煩惱,其中一種情況,可能係老細好賞識你,教識你好多嘢,比機會你晉升,而且同事好夾環境好愉快,唔知走唔走好。

既然老細環境同事各方邊都咁好,點解仲要走?大多數情況,一字記之曰,錢。

曾經睇過一份報告,佢用一批能力,學識,工作經驗同工作環境都相差唔遠嘅人去做研究,發覺三年之後,有轉工嘅人,比留守原位嘅人,人工高出50%~100%。

俗套講,魚唔過塘唔肥,人工係跳出嚟。

眼見身邊嘅朋友開始搵得比自己多,眼見自己嘅能力已經有返一定程度嘅水平,點解自己嘅人工唔可以証明自己嘅能力,同市場脫勾?

呢個時候就開始抱怨,點解老細唔加人工比自己。

其實人工唔啱,咪搵工走咯,天經地義,但偏偏你對賞識你,帶你出身,比機會你嘅老細有情有義;其實你係唔想走,就算唔係極高人工,只要加到市場水平甚至低少少,你都唔會介意,已經可以安心留低繼續拼搏,但偏偏,多番暗示後,都係加唔到心目中個價,甚至唔加。

就係呢個時候,你嘅工作狀態,會出現咗一個轉捩點;明明一直充滿正能量拼搏嘅你,會變得好負能量,不斷咁問自己,點解幫公司老細付出咗咁多,但自己少少回報都無?

其實情與義,難值千金。 

職場,大部份時候,都係穩定勝於一切,所以就算你做得幾好,老細點同你拍住上,如果公司無Budget,你一樣都係原地踏步。

如果當你諗,點解無回報,好氣憤,好想嬲你老細嘅時候,不妨平心靜氣分析下,究竟公司係唔係真係無Budget?你老細都係無能為力?

打個比喻,係一間好大嘅國際性機構工作,公司架構已經定好晒,你只係一粒鏍絲 ,就算做得幾努力都唔會影響到盤生意,其實你係無乜議價能力;反之,如果公司好細捉襟見肘,就算你好重要好有議價能力,人工加薪都唔會加得多。

所以感情還感情,搵食還搵食,同老細之間幾咁有情有義都好,返工始終係講錢,再者,如果你老細唔係反轉豬肚就係屎嘅人,你同佢講因為錢而走而佢又比唔起,佢都會祝福你離開。

老細只會一邊高興自己教導有方,愛徒可以振翅高飛,有更好嘅發展,而別一邊會因為無咗個得力助手而暗自神傷。

我聽過一個朋友講,老細升佢嘅時候,Title升得勁但人工加少少,好刻薄衰格,當堂對佢之前亦師亦友嘅感覺改觀晒。既然只係加得少少人工,點解仲要升你兩個Grade?無人會蠢到認為虛名比實際重要,可以留人吧?其實一個 underpaid 嘅 manager,點都勝過一個 overpaid 嘅 officer,呢個可以係準備搵工嘅訊號,大家明白,我比唔到你,你坐暖咗就好走啦。

所以情與義,別貪心,老細肯教你嘢,唔害你,已經係辦公室最大嘅情與義,錢一唔到位,唔洗煩惱,搵工啦,免得增添自己嘅負能量。

辦公室某程度上真係唔好講感情,等於你同一個唔需要愛情嘅人拍拖,投放太多期望但沒有回報,只會傷身;要回報,始終都係自己努力去搵。

Become our fans