職場4件死神的聖物 | cpjobs
Home > Career Advice > Tips To Be More Productive At Work > 職場4件死神的聖物

職場4件死神的聖物

Published on Monday, 23 Apr 2018
傳說中有四兄弟,佢地有一日行經一間由死神掌控嘅公司,呢間公司嘅員工生不如死,皆因佢地經常被幾件死神的聖物殘酷對待。四兄弟見到員工咁慘情,所以施展魔法,變咗條橋出嚟令裡面嘅員工逃出苦海。死神見到呢四兄弟喺度攪事,感到極度憤怒,但狡猾嘅死神冇即時殺死佢地,反而假裝稱讚佢地魔法高強,決定將死神的聖物交出嚟送畀佢地。四兄弟各執一件死神的聖物,縱然佢地法力高強,但根本駕馭唔嚟。結果死神嘅魔法從呢四件聖物流落民間,出現喺全世界各大公司裡面,令死神喺職場無處不在。
 
聖物一:Deadline(死線)
 
Deadline,中文係死線。死線呢個名改得好好,因為趕唔切真係會死。Deadline喺公司裡面無處不在,打工仔每一日都被Deadline圍繞,細至覆個email,你同事都會幫你製造條纖幼嘅死線:
「喂!我email寫明咗要你聽日6點前覆我㗎喎!」
大至你老細set畀你條勁粗嘅死線:
「我限你地喺今晚凌晨12點前一定要追到條大數!」
有時死線甚至會不合情理咁突然出現,殺你個措手不及。例如:「我想要近十年嘅Sales Report,15分鐘後要!」你真係隨時死畀佢睇。
 
聖物二:上手的爛攤子
 
死神利用人類自私嘅性格,製造出呢件聖物。當一個員工由一個職位調去另一個職位,又或者一個員工離職,好容易會出現爛攤子。有時越資深嘅員工,留下嘅爛攤子就越大。香港員工離職嘅通知期通常都只係一個月,假設一個做咗10年、平日做嘢有返咁上下忙碌嘅員工離職,淨係未做Filing嘅文件就已經可以壓死你。有啲不負責任嘅員工,因為已經遞咗信,就將一啲唔想處理嘅工作放埋一邊,直至離職就交畀下一手。上手嘅爛攤子對新接手、咩都唔熟嘅同事嚟講,簡直係災難級。
 
聖物三:死貓
 
人類自私嘅本性令死神製造出另一件威力強大嘅聖物:死貓。喺好多公司入面,當有重大嘅錯誤發生,第一時間唔係解決件事,係問:「邊個做嘅?」當做錯嘢嘅人較為自私,冇膽面對問題,佢就會想盡辦法將責任卸畀其他人。如果呢個人身在高位,下面嘅人就好可能成為代罪羔羊,食咗呢隻死貓。硬食嘅人會極度委屈,明明自己冇做錯又要負責,造成心理不平衡及嚴重嘅心理陰影。如果冇向適當嘅人作出傾訴,隨時會屈到病。
 
聖物四:穿隱形斗篷的同事
 
畀條好簡單嘅數學題你計一計,你條Team入面有10個同事,但有5個經常都唔見人影,咁其實你條team有幾多人做嘢?今次死神利用咗人類懶惰嘅本性,製造出令人可以隱形嘅斗篷,從工作崗位中消失。佢可能成日放病假、成日唔知行咗去邊、又甚至佢軀殻喺度,但靈魂隱形。同事隱形,令其他人工作量增加,公司效率都因此變差。
HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans