踢走憂鬱星期一 | cpjobs.com
Home > Career Advice > How To Be More Productive > 踢走憂鬱星期一

踢走憂鬱星期一

Published on Monday, 14 May 2018

時間係上午6點鐘,你正享受緊同男神╱女神喺日本富士山下睇完日出,佢依偎喺你身邊。淡黃色嘅天空,旁邊伴著悅耳嘅雀仔叫聲,陣陣清風吹過,揚起對方嘅秀髮,彷彿世界只剩下你地兩個。天空慢慢變得明亮,你地相互對望,雙方被浪漫氣氛籠罩,你地面對面開始靠近,雙眼合上,感受著對方嘅氣息,嘴唇亦漸漸接近對方。就喺呢個時候,你聽到一漸怪叫,嘟嘟嘟嘟……

初時你以為係某種怪鳥嘅叫聲,但啲聲音愈嚟愈近,亦愈嚟愈清晰。你慢慢張開雙眼,男神╱女神不見了,你見到嘅係一件對人類好重要而又好乞人憎嘅發明 —— 就係你牀邊嘅鬧鐘!

你心裡面爆咗無限句粗口,大大力一手拍熄佢,心情極度惡劣。你感到討厭嘅原因唔係因為佢喺最重要嘅時刻奪走了你嘅男神╱女神,而係你諗起今日又係星期一,一個痛苦循環嘅開端。

你日復日,年復年活喺呢個循環入面,痛苦慢慢麻木,尤如溫水煮蛙,你不自覺咁將痛苦看成習慣。世界上有好多人都痛苦得好舒服,因為佢地永遠留喺Comfort zone入面痛苦。如果今個星期一你依然喺起身嘅時候感到痛苦,有冇諗過痛苦可以唔係必然?其實你可以改變,但你首先要認清你痛苦嘅原因。

因為工作時間?
喺外星人消滅宇宙一半人口之前,香港嘅長工時應該會繼續喺呢個宇宙名列前矛。你係唔係每日由朝早工作至凌晨,失去自己嘅生活?失去對自己人生嘅掌控權?人冇咗生活嘅感覺就好似冇存在過一樣,唔好到外星人將你化灰嘅時候先後悔。

因為工作內容?
當你返朝九晚五,計埋OT,你可能一日有十幾個鐘貢獻咗比你份工。既然工作佔咗我地人生大部分時間,如果你對做嘅工作冇興趣甚至討厭你每日做緊嘅嘢,你會過得痛不欲生。份工作係咪太苦悶?係咪冇興趣?會唔會因為工作太重覆令你失去熱情?有冇諗過自己可以做其他嘢?

因為人工低?
我諗呢個世界冇邊個唔想人工高啲,我聽過唔少人講:「如果你加我人工,我幫你做多啲又點話?」但事實係加咗人工之後,依然不停埋怨工作好痛苦。錢固然重要,唔係點供樓養妻活兒,但錢未必係長遠消除痛苦嘅解藥。最近蘋果CEO庫克就喺一個畢業禮上勉勵過年輕人:唔應該為錢工作,因為錢永遠唔夠,你應該要知道自己鍾意做咩,點先會有熱情,一份同自己價值觀相約嘅工比巨額收入更重要。

你的工作有意義嗎?
一份工作對每個人嚟講都應該有一個意義,呢個意義可以係遠大至好似SpaceX嘅員工咁致力送人類上火星;細至可以係為咗令公司每個人都可以享用到乾淨嘅Pantry嘅茶水姐姐。我地要問下自己我地到底係為咗咩而工作?我地做嘅嘢對於自己、對公司、甚至對呢個世界有咩意義?

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans