轉工瀕密的迷思 | cpjobs.com
Home > Career Advice > How To Find A New Job > 轉工瀕密的迷思

轉工瀕密的迷思

Published on Monday, 13 Nov 2017

Jumpy(轉工瀕密)呢個字相信困擾過好多求職者,同時其實又困擾緊好多HR。求職者怕因爲轉工轉得密而被僱主嫌棄,好似record花咗就永不超生。HR又擔心求職者習慣性轉工,冇份工做得長,因而要不停輪迴請人。求職者同僱主喺Jumpy呢個問題上不停角力,如果男人來自金星、女人來自火星,喺呢個問題上面,僱主同求職者應該係水星同海王星嘅距離。其實Jumpy重要嗎? 求職者又應該點樣答?又或者有冇諗過自己點解會Jumpy呢?

Jumpy重要嗎?

其實每間公司、每個HR對Jumpy都有唔同嘅定義,好難話幾多年做過幾多份工先算係Jumpy。睇一個人係咪Jumpy,唔係淨係數佢做過幾多份工,HR更著重係佢嘅離職原因。首先,有啲人做嘅可能係合約工,做完唔會續約、有啲可能係不幸遇上裁員或公司重組而被逼離職。呢啲原因HR都會視為被動離職,唔會當佢係Jumpy。而如果係主動轉工比較多,轉工嘅理由先至係關鍵。日

Jumpy應該點答?

好多時轉得多工未必係死因,反而可能係轉工理由出現問題。記得之前喺討論區見過有人出post投訴,話自己去見工嘅時候不停畀個HR challenge佢成日轉工,佢心諗我份CV一早寫咗我係做過咁多份工㗎啦,如果你地係接受唔到,點解要叫我上嚟浪費大家時間呢?

佢咁諗其實又好正路,但有冇諗過點解HR明知你Jumpy都叫你上嚟見工?你估HR真係得閒冇嘢做,會搵個明知唔會請嘅人上嚟見工咩?呢個可能性相信比較低。我唔知呢位求職者係點答呢條問題,一般最常見嘅答法會偏向答份工唔適合自己嘅原因。例如「份工比較悶」、「已經識曬啲嘢」、「老細唔好」等等,但實情係呢啲答案都冇乜說服力,HR真正想睇嘅係你轉工嘅心態。求職者應該嘗試諗下,自己喺以往嘅工作有冇學到啲咩?轉工點樣幫到你嘅career? 搵到將來嘅方向?要show到正面嘅心態,畀到HR信心你未來係會穩定落嚟。

求職者嘅自我反思

好多人開心又轉工,唔開心要轉工,老老豆豆,如果你夠叻,或者每次面試都能夠好有技巧咁解答HR對你Jumpy嘅問題,無論CV幾jumpy,都有可能搵到公司請你。不過你有冇面對過自己深層次嘅問題?到底係為咩而轉工?

畢業出嚟做嘢頭嗰幾年作多方面嘗試都係好合理,但去到一個點你係應該會搵到自己嘅方向同想要嘅目標。如果你一直處於輪迴嘅狀態,證明你可能仲有啲嘢未學識,未真正搵到自己轉工嘅目的同方向?

僱主都要反思

時代在轉變,新一代比較著重工作自由、時間彈性,偏向鍾意做freelance或短期工作。有時HR遇著一啲對Jumpy比較執著嘅老細,其實都幾頭痛。如果純粹因為求職者做多幾份工而唔請,未來要搵到個啱心水嘅人就更加困難。今時唔同往日,可能我地都喺時候要加返少少彈性。

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans