點解唔轉工嘅人仲得人驚? | cpjobs
Home > Career Advice > Tips To Be More Productive At Work > 點解唔轉工嘅人仲得人驚?

點解唔轉工嘅人仲得人驚?

Published on Thursday, 20 Sep 2018

「點解你成日轉工?」好多Interviewer面試嘅時候都會問呢條問題。的而且確,好多主管都會唔鍾意請一啲轉工頻密嘅求職者,覺得佢地欠缺穩定性,請完轉頭又走。不過好多時我地淨係睇到成日轉工嘅唔好處,而忽略咗轉工其實都有好處。有時做廿年都唔轉一次工嘅人,比起會轉工嘅人可能仲得人驚。

1.接受唔到新事物

有一次有一個新同事對一件事提出意見:

「我喺以前公司有咁嘅經驗,我地可以考慮咁樣做⋯

點知佢都未講完個Idea就畀另一位喺公司做廿年嘅老員工打斷。

「唔得!喺呢度一定唔得!」

一個人喺同一個環境工作廿年,而同時冇積極去認識外面嘅世界,咁佢嘅世界就只局限喺自己間公司。佢唔理解外面嘅世界原來可以有更好嘅方法去做同一件事,就好似身邊到今日都唔肯用手機嘅親戚一樣。

2.經驗單一

就算係做同一個工種,喺唔同行業都有佢嘅特色。例如做HR咁,做開工程界嘅未必適合飲食界,因為每個行業都有佢嘅獨特性,如果做咗一個行業十幾廿年要轉去另一行業就會變得困難。反而趁後生接觸多一兩個行業,將來長遠發展嘅選擇會比其他人多,亦都可以令自己有多樣化經驗,可以從多角度思考。

3.適應力慢

喺同一間公司不停重覆做同樣嘅事,日子有功就會形成強而有力嘅Comfort zone,威力媲美李氏力場。喺Comfort zone留得耐,好易令人生銹唔想郁,久而久之就因為唔願改變而失去適應能力。反而對於肯轉工嘅人嚟講,轉變當食生菜,去到新環境適應力迅速,但對於十幾廿年先轉工嘅人嚟講,要佢即刻上手就有啲難度喇。

4.可能走得仲快

喺一份工做得耐,無論工作態度、工作方式、處事模式等等都已經根深柢固。愈做得耐,改變對人帶嚟嘅衝擊就愈大。如果十幾年冇轉過去新工作環境,一時間適應唔嚟就好易有離職嘅念頭,結果可能比任何人走得更快。有啲人甚至由原本極度穩定而變成Jumpy,就係因為發現自己適應唔到其他新環境,反而不停轉工,渴望搵返同以前環境相似嘅世界。

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans