Career Advice Job seek in HK

6個面試成功嘅訊號

去完心儀嘅公司面試,過完一關又一關,最後終完打完大佬見完老細,然後佢同你講:「返去等消息啦!」返去等消息呢幾個字真係好折磨人,等呢段時間嘅感覺,直頭好似去海馬公園玩跳樓機,被人升咗上半空之後等佢跌落嗰下咁漫長。如果要我比呢段等待加上一個感覺嘅期限,我會話係一萬年。

 

去面試好緊張,但等結果期間更緊張。好多時我地去面試,見完之後都唔知機會有幾大。不過其實我地可以回想一下面試過程有冇出現過一啲正面和成功嘅暗示,令我地可以唔多唔少猜測到面試嘅成功機率。

 

1. 面試官嘅身體語言

喺面試過程入面,你可能覺得為咗應付面試內容已經自顧不暇,仲邊有咁多時間留意面試官嘅身體語言,但其實對方嘅身體語言某程度上反映緊佢對你嘅興趣有幾大。例如喺談話過程中,佢身體向你嘅方向傾斜,同你有緊密嘅眼神接觸,或同你對話嘅時候不停點頭,都係反映緊佢對你嘅興趣。

 

2. 對你嘅專注程度

大老細貴人事忙,抽到少少時間出嚟做面試已經皇恩浩蕩。見工嘅時候留意下佢對你嘅專注程度,例如會唔會得閒睇下電話、得閒睇下電腦、望你嘅次數有幾多、對你講嘅說話有冇反應等。佢喺你身上愈專注,你成功嘅成數就愈高。

 

3. 有冇Follow up你嘅答案

好多求職者都好怕被面試官挑戰自己嘅答案,但面試過程係一種溝通,面試官就住你嘅答案再問你,可以係一種對你有興趣嘅訊號。佢嘅目的只係想搞清楚你嘅想法,係咪符合佢公司嘅要求。如果面試只係有一問一答,就會好似一澤死水,了無生氣。

 

4. 佢講幾多嘢比你聽

面試除咗去答問題,我地都要留意對方同我地講啲咩。你可以留意下佢有冇主動介紹下公司文化、職位所屬嘅部門、工作內容、大家嘅工作時間,甚至介紹下附近有咩食、辦公室個廁所喺邊度。只要佢講得愈多及越仔細,你成功嘅機會就愈高。因為如果佢對你冇興趣,同你講多句都無謂。

 

5. 勁Sell你公司嘅好處

如果面試官對你嘅興趣夠大,其實佢可能會主動吸引你加入佢地公司。佢會同你講下間公司嘅願景、希望做到啲咩、佢點樣符合到你嘅要求、點樣幫到你將來嘅Career。有聽過有啲老細直頭帶埋求職者參觀公司,甚至介紹埋同事比佢識。如果見到呢啲訊號,證明佢好想得到你嘅效力,一切可能只待人工傾掂數。

 

6. 面試後嘅Follow up

好啦,見完大老細返屋企等消息有一日突然電話響,見到來電顯示係佢地打嚟,點知竟然唔係出Offer,只係打嚟問你攞資料。聽電話嗰下一心以為得米,點知原來唔係,嗰下難免有啲失望。不過呢個係其中一個好大嘅訊號,再問你攞更多資料,證明已經進入最後批核階段,交齊文件後,相信離出Offer之日都不遠了。