Fresh Grad面試3招 | cpjobs.com
Home > Career Advice > How To Find A New Job > Fresh Grad面試3招

Fresh Grad面試3招

Published on Thursday, 26 Jul 2018

雖然傳統Fresh Grad搵工黃金期喺3至4月,不過而家大家都會興去轉畢業旅行先返工,所以嚟到7月,好多Fresh Grad仲搵緊工。去完旅行,係時候要修心養性,準備迎接夢幻又美好嘅打工仔生涯。

雖然話就話過咗一般畢業時間,但如果你唔係一定要做MT,呢個時間應該仲有好多選擇。不過多選擇還多選擇,一有啱嘅見工機會就要好好把握。打機Chok超必都要睇下攻略,見工前都一樣要學返幾招旁身。

1. 天下見工唯快不破

學火雲邪神話齋,「天下武功,無堅不催,唯快不破」,面試一樣要好好運用一個「快」字。一般嚟講,面試官都唔會成日坐喺度淨係做面試,佢好可能係百忙之中抽少少時間出嚟見你。記住,你時間好有限,佢耐性都可能好有限,你要儘快令佢對你產生興趣。要做到呢一點,面試前首先要做足準備,清楚了解職位嘅職責,將你自己對份工有幫助嘅強項寫落嚟,然後喺面試時搵機會講出嚟。只要你夠快吸引到佢注意,你嘅成功率就會大增。

2. Group in.別攻得太狠

好多面試第一關都可能係團體面試 ( Group in. ),如果你有感受過團體面試,當中嘅壓力比起單對單面試可能會更大。好多人面對自己嘅競爭對手都會「硬」起來,擺出準備狂攻嘅姿態。不過,喺Group in.嘅時候瘋狂展示自己嘅攻擊力未必係一件好事。Group in.開始前你要先諗一諗,點解呢個職位要Group in.?從而再諗下面試官到底想睇啲咩。例如如果你個職位要面對客人,佢地可能會睇你待人接物嘅態度、團體合作程度、有冇重視他人意見等性格。但如果冇諗清楚,一味show off自己嘅領袖能力,唔好意思喇,你都係早啲返屋企啦。

3. 人靠衣裝

有人話:「教主Steve Jobs當年去見工,都係著住涼鞋甚至一身體味,最後都見得成工,所以有實力嘅話,唔需要著得太靚都冇問題。」不過,你係咪教主先?有實力當然係好大優勢,但首先你要睇下去見份咩工,教主當年係去見技術性職位,以教主戰鬥力當然輕易獲聘。我地身處比較傳統嘅東方社會,「人靠衣裝」呢個道理都刻得幾深。既然你唔係教主,都係乖乖地著返件衫啦。特別提一下,好多Fresh grad.都以為去見工一定要一身黑色Full suit,有次見到一批黑衣人坐喺梳化,真係以為成班殺手嚟見工,其實而家某啲職位Smart casual都可以,唔一定要成身黑色嘅。

 


上文章刊於《招職》。

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans