Career Advice Job seek in HK

【僱主話你知】10個寫CV常見禁忌 一犯即刻無運行

不論你係搵緊工、想轉工、抑或純粹想睇下出面咩環境都好,CV都係需要經常update。預先準備好,永遠好過「臨急抱佛腳」,急就容易錯,尤其係CV代表緊自己,僱主未見到你個人,就係用CV去衡量你係一個點樣嘅人,而呢個印象分,分分鐘影響你得唔得到呢份工。

 

究竟有咩錯誤係我哋經常都犯?有咩地方喺僱主角度係最致命?一齊睇下。

 

1. 錯Grammar,串錯字

順眼同哽眼係一字之差,由頭睇到尾通順無問題係最基本。CV通常一頁起兩頁止,資料盡量簡單,同時可以表現到過往工作經驗同成果,一有語法上嘅錯誤或者串錯字就會好明顯。

 

可以點避免?可以試下用Grammarly呢類拼寫文法嘅checker,寫完之後,print出嚟做proofreading,比起喺螢幕上面睇,紙張上你會更清楚自己寫成點。

 

2. 資料誇張失實

寫CV最重要係讓僱主了解你嘅工作經驗同技能適唔適合嗰個職位,係嘅,技能愈多,經驗愈多,CV愈有吸引力,但誇大事實往往好容易被拆穿。例如你話自己你一個Microsoft Excel嘅Expert,但Job description要求一個會利用vlookup,hlookup,VBA programming,Pivot table等技能嘅人,識唔識,一問就一清二楚。

 

可能你會話:「唔係喎,咁我都叫見到工吖。」OK,祝你好運。

 

3. 格式唔靚仔唔Align

僱主點睇一個人夠唔夠細心?見微知著,由格式開始。收到你份CV,HR做完基本screening會print出嚟畀部門主管或者經理,格式簡單,清楚,易睇係關鍵。上下左右行距會唔會太窄,用嘅字體會唔會太多,font size會唔會太細,細項會唔會又用「・」又用「1. 2. 3. 4.」?

 

伸延閱讀:

【寫靚份CV】究極CV排版設計

【寫靚份CV】3分鐘揀啱字型,贏得決勝分

 

4. 內容千篇一律但無重點

坊間有好多CV template畀我哋參考,但參考唔好變「抄考」,你需要寫多啲關於你個人嘅嘢,例如有人會寫:

"I’m a hard-working, driven individual, who works well independently and as part of a team."

 

喺僱主嘅角度,佢會想知:你喺咩事上面體現到?你點樣得到呢啲特質?同你申請呢個職位有咩關係?我哋喺CV上面嘅資訊,需要有根有據,而唔係陳腔濫調。你亦可以喺CV嘅開頭加插一個簡短嘅self-introduction或者professional bio,等僱主可以了解你多啲。

 

5. 專注喺工作經驗而唔係工作成就

寫CV嘅時候,我哋好易會將重點放喺「喺邊間公司工作」,「有幾多工作經驗」,「手握幾多技能」,當然呢啲都係重要,需要放喺CV入面。但係,僱主更加想知道你喺工作上面有咩achievement,而呢啲achievement可以為新公司帶嚟啲咩新見解,呢類資訊先值得你花多啲心機撰寫擺落CV。

 

6. CV過長

比較理想係一頁內寫完,如果你經驗豐富,好多資料需要放入去,咁重要嘅資訊應該放晒喺第一頁。當僱主每日收咁多份CV,好難會期望佢睇晒所有資料,有人力資源機構做過研究,僱主平均只會用7秒去睇一份CV,你7秒可以睇到幾多嘢?

 

當然,CV嘅長度都取決於唔同嘅職位,例如比較Senior嘅職位。但要記住:CV係重質(工作成就)唔係重量(頁數)。

 

7. 錯嘅聯絡資料

寫錯聯絡方法係一個好常見嘅錯誤,係咪估唔到?因為大多數打工仔都會專注喺內容撰寫上面,呢啲小細節反而會忽略咗。試諗下,僱主睇完你份CV,覺得可以進一步認識,但聯絡唔到你,真係無奈。

 

8. CV唔係為職位度身訂製

世上無一份完美嘅CV,只有比較適合。每個職位需要嘅技能同經驗都唔一樣,就算大家都係請I.T,需要嘅profile都好唔同,寫得太長太多,僱主又未必睇到。

 

所以你需要細心睇下職位嘅職能想要啲咩,再喺你份CV加以修改。Highlight一啲比較重要嘅keywords,等僱主可以睇到,畀佢知道你嘅成就,經驗同技能都適合,而唔係一次過拋晒所有嘢出嚟叫人欣賞你。

 

9. 無寫興趣 / 興趣寫得太多

睇到呢度係咪覺得好奇怪,咁寫定唔寫?Hobbies係一個好蝦人寫嘅部份,寫得好可以展示到你係一個點樣嘅人,同時可以幫你表達喺興趣入面,點樣令你得到唔同嘅Transferrable skills,當然,係講得通先寫入去,無理由鍾意唱K都寫啫⋯⋯

 

10. 電郵地址太奇怪

每個人都有過去,我哋嘅email可能由中小學一直用到而家,但如果你嘅email address改名太奇怪,都會令你同心儀嘅工作愈來愈遠⋯⋯ 點解?因為唔Pro呀!試諗下僱主收到你嘅application email,係from: ilovehellokitty@xxxxx.com / iamhandsome@xxxxx.com,你份CV可能會即刻跌入Trash bin。