Career Advice Job seek in HK

【僱主話你知】3步了解自己有咩「可轉移技能」 搵工轉行其實唔難

轉唔轉行,對於打工仔嚟講係一個大課題,除咗要考慮行業發展前景,仲會擔心自己累積嘅經驗同技能喺另一個行業上有無用處。而喺僱主角度,係咪只會考慮熟行情有工作經驗嘅人?未必,但你必須要知道自己有咩「可轉移技能(Transferable skills)」。

 

咩係「可轉移技能」?

通常我哋喺履歷表上面,都會列出兩種類型嘅技能,分別係「硬技能(Hard skills)」同「軟技能(Soft skills)」。

 

Hard skills係指技術性嘅能力,例如係某啲行業嘅專業技能:會計、編寫程式、電工等等,呢啲技能可以喺行業上面通用,但其他行業就未必用得著。

 

而Soft skills,即係Transferable skills,係能夠超越行業界限嘅技能,幾乎喺任何職位上都有需要,例如:人事管理、項目管理、溝通技巧、演講技巧等等,都係需要「浸返嚟」,而唔係需要考牌得到。但係打工仔可以點樣知道自己有咩Transferable skills呢?以下3步可以幫到你。

 

 

第一步:寫低自己一日嘅工作要做啲咩

喺同一個崗位入面日子耐咗,雖然感覺上揹住好多職責,但好似好多工作都係手板眼見(成日都聽好多打工仔話自己係打雜,咩都要做)。然而,呢啲成為你日常習慣嘅工作內容,喺其他行業或者職位當中,可能會受到高度追捧。

 

例如:

  • 作為客戶服務業前線嘅你,每日要面對唔同性格同情緒嘅人,點樣喺短時間內降低客人不滿度,點樣了解客人問題所在,係需要有強勁嘅溝通能力。
  • 作為負責工廠日常營運工作嘅你,每日需要編排工人嘅工作,務求作業嘅品質達到要求,過程順利可以追到進度,人事管理同項目管理嘅經驗必不可少。

 

呢啲都係僱主相當睇重嘅技能,係唔能夠喺書本上學到。

 

 

第二步:用呢一份職責清單 評估自己嘅長處

當你寫好咗自己每日嘅工作要做啲咩,有咩職責之後,可以睇下自己最擅長係做啲咩。

 

  • 你嘅上司或者同事認可(Endorse)你邊一方面嘅能力呢?試諗下喺工作分配上,佢哋最信任你做邊一個部份嘅工作。
  • 有邊一啲技能你認為只係「工作嘅一部份」,簡單到自己都忽略咗?有無啲技能或者工作內容你係好擅長,做咗都唔覺?
  • 喺你嘅工作內容入面,邊一個部份係你做嘅時間最耐?亦係最有信心?

 

 

第三步:諗下邊啲能力畀到你最大嘅成就感(或滿足感)

檢視一下自己有咩強項,邊一啲能力係其他人認同,而當你運用呢啲能力,做到成果嘅時候,你會得到滿足感。喺尋找新職位嘅時候,可以喺履歷表入面突顯(Highlight / Bold)呢啲能力並且向潛在僱主加以推銷,你嘅自信絕對會為你帶嚟優勢。

 

另外,當你去見工畀人問「點解你想轉行?點解你會覺得自己勝任?」嘅時候,你亦可以按住你嘅能力同長處加以發揮,令招聘人員覺得你嘅能力係足夠,而且可以彌補經驗上嘅不足。

 

 

希望大家轉工轉行順利!