Career Advice 名家分享

【投資導航】26歲未婚搵13萬個案

問 Hi諗Sir, 希望你能簡單教一教小弟,如何更有效處理財務問題,製造多一些被動收入。小弟今年26歲 ( 未婚 ),出身於公屋家庭。我一直努力儲錢,終於上年成功上車。本人現月入約13萬元左右 ( 做小本生意 ),每月約儲11萬元左右,收入穩定。現在與家人繼續居住於公屋,自己層私樓放租,每月約收15,000元,供樓成本約每月約17,000元。未來兩年將結婚,但有感自己層樓唔近工作地點,所以結婚後都會以租養租方式於市區租樓住。 本人資產如下: •私樓銀行估值650萬元 ( 買入價540萬元,借八成,利用擔保人上會 ) •一間甲級工廈單位市值560萬元,買入價460萬元 ( 同朋友夾50%,利用朋友名上會借七成,每月供20,000元左右,收租15,000元,租金同供樓與朋友每人佔50% ) •股票約80萬元左右 備註:我無其他外債,有公司戶口,公司登記人唔係我 ( 名義上我係員工 ),另公司可以做到自動轉賬薪金紀錄。

本人想盡快完成一生三宅及製造多些被動收入,有感即將結婚,想為未來打算。以下有一些投資方案,但我唔清楚先後次序如何,或希望諗Sir有一些更好的建議。

1.現在居住的公屋係母親名 ( 已退休 ),打算用綠表換居屋,但我已買樓唔知銀行點計我借貸能力。另假設幸運用綠表抽中居屋,按揭方面如何計算?( 因為我會負責出首期同供樓 )

2.朋友一直建議我買香港上市公司債 ( 年回報8% ),請問上市公司債同你經常提及的債基有何分別?上市公司債基就咁聽好似無咩風險,但實則有咩細節要留意?

3.預計一至兩年打算用未婚妻名義 ( 首置 ) 再買一間私樓,但可能會抽新樓,因為可以較易上會。假如順利抽到,我會幫未婚妻做好條數,銀行應該就唔難批,我會負責出首期及供樓。

4.投資車位,因為覺得升值潛力好大。

請諗Sir指點迷津,謝謝!

 

如果用綠表身份買居屋,可保證做到25年上會而讀者需擔保已退休母親供樓,至於讀者月入13萬元,借貸力理應是130,000 / 10,000 x 50% x 2.59 = 1,680萬元,在已購一房借了540萬 x 80% = 432萬元之下,應可夠力再擔保母親買居屋。惟筆者估計讀者只有一些想法,未有想清執行上步驟及支出。我們就講使費吧,首先13萬元月入做Autopay,意味僱主要將條數落IR56表格將收入報比稅局,打薪俸稅估計21萬元,亦即依讀者現時Planning去為自己構建收入去易借按揭,成本超廿萬元!那究竟點就到銀行又信服讀者收入到某一水平,而又盡量將稅用公司名義「食咗佢」,就屬要考量地方。

債基是一堆上市公司債券,呢「堆」公司不一定喺香港,組合更有達千條債券,好處是千條債券組合有效對應買發債公司倒閉此死門。另外債基每月派息加上可槓桿 ( 客人自己選擇 ) 去倍大收息,上述幾個好處是直債 ( 公司債券 ) 沒有的。當然直債有張皇牌可彌補佢成半年先收息一次,及入場門檻大多20萬美金開始的缺失,就係直債持有人只要將債揸到到期就可保本,除非公司倒閉吧。不過讀者年紀廿六,其實不要將理財重心放債,雖然筆者經常在BLOG提直債、債基,但不表示係人都要用「呢兩味」的。

年輕人如讀者,理財宜用股票及樓,因買樓要穩賺需用長時間去拉死當初借下的債,銀行亦很現實對45歲之上人士每年逐步調低可借額。至於後生買股票很贊成,反而中年儲到一大筆錢先學人買股票,咁做真係睇到都覺「牙煙」。買股票要技術,這些可以學。但買股票要贏及大贏需要高質心理,這些需時間浸淫的。相反買債者只能中度運用槓桿,而爆炸力又無股票咁好,債券只宜一批求穩而願意放棄槓桿及倍升的人,呢類人就係快要考慮退休的40後。另留意,買股唔係好似讀者咁80萬元流動資金咁全部坐晒落股票咁去買。

債券及債基亦有另一不好處,就係派息雖好但長遠不可跟通賬同升跌。即係今日係上完收息101咗左債基收15%好開心,但10年後你睇返今日的15%,會發現金額開始唔夠用。而買樓收租可享租金同通賬大致同升之優勢,故住宅同享有高抵押力,產出收入與通賬掛勾,加上流通性好與出租率高三大優點的,睇得通自己明點解樓係咁貴。( 當然政府開始樓房類稅項亦有助燃 )

車位同住宅比抵押力較低 ( 單買車位一般只可做15年按揭,息率亦比供樓貴1% ),產出收入可同通賬掛勾,流通性比住宅低而出租率都比住宅低,讀者可審視筆者指出數項再作深思。

 


以上文章刊於《招職》。