Career Advice 職業特搜

【行業內情】巴士司機入職要求、人工、福利及Career Path係點?

每次搭巴士,見到車門貼住車長招聘廣告,寫到人工高福利好,都不禁有啲心動,又唔使坐Office咁悶;不過都擔心工時長或者遇到難搞乘客。呢份工究竟好唔好做呢?

入行難唔難?

香港有九巴同埋城巴、新巴 ( 呢兩間屬同一機構 ) 巴士公司,另外仲有龍運專做機場線;如果想入職,其實門檻唔高,無年齡、學歷要求,最基本求係要有三年嘅1A牌,即係私家車自動波,同埋會安排你驗身,見工時傾計了解吓點解要入職呢啲基本嘢,同埋要試揸私家車比面試官睇。如果已經有巴士牌,就會要你示範。之後應徵者要去警署做個駕駛記錄證明,交比巴士公司。其實好易就入到職,因為好等人用。

成功受聘後,巴士公司會安排新員工接受訓練,考取車輛類別10 ( 公共巴士 ) 或者車輛類別17 ( 專利公共巴士 ) 牌照。之前首先做十幾日訓練,包埋路面訓練、課室上堂同埋車型訓練,之後就會考牌。

呢十幾日訓練入面中,要操行駛路線,考牌後會分配兩條線比員工「操線」,即係做路線訓練。畢業後,就會做返呢兩條「線底」。做夠三、四個月,就會再比其他線你操。之前大埔巴士意外後,就無咗「跟線」呢回事,即係要自己搭巴士去學習點揸呢條線,只要由該位站長簽名確認,咁樣跟兩次就可以自己揸。依家就一定係師傅加三個要學嘢嘅車長,去操一條線,每個人都要落手揸。

另外,車長都要學八達通機、報站器同埋車頭路線牌,呢啲都唔難學,按幾個掣就得。不過有啲四十幾歲或以上、少接觸電子器材嘅Uncle就難啲,後生就無問題。受訓時都有人工嘅,按日子計算。通常一班十幾廿人當中,都有八成合格率。之後就正式開工啦。

人工及福利是否吸引?

至於人工方面,係咪真心筍呢?以前底薪得一萬一千幾,另外加安全獎同埋服務獎,所以都OK嘅;依家就係將後兩者併入底薪,所以睇落人工高咗,有成二萬幾蚊,其實唔算加咗好多。不過揸巴士都仲有好多「搵錢位」,例如揸通宵更有特別津貼;另外如果揸「蛇車」,即係朝七到十一,然後中間休息,之後下晝四、五點再返工,都有津貼嘅。另外長工都會有兩個直屬家人嘅家人乘車證,即係父母、老婆或者子女,可以免費搭車,而且都有醫療保險,同其他公司比,福利都算正常啦。

如果唔想做全職,都可以考慮應徵做兼職,已經有巴士牌嘅,再訓練十日就可以開工。無巴士牌都會請,當然要做齊訓練工夫先。通常兼職都係揸特別更,例如話有演唱會加開路線咁,若然做開Freelance,想搵兼職,都係不錯選擇。

返工方唔方便?

港九新界都有巴士線,所以公司都好顧及員工需要,盡量安排返居住地點返工。假設係住馬鞍山,屬於沙田區,就會調派去返沙田廠。不過都有情況係,住長沙灣嘅同事,想去荔枝角廠,但佢住嘅地方「擲界」,又唔算好近荔枝角廠,加上個邊人手飽和,就要去沙田返工,但之後都可以申請去返荔枝角。另外,如果搬屋,都可以同公司講,再調地點。至於返工地點就視乎係早更定夜更;早更要返廠攞車,放工通常係站頭,因為夜更會係站頭接車。至於夜更收工,要返廠入油泊車,所以要返廠放工。

有足夠時間食飯及如廁

大部分路線都夠時間食飯同埋去廁所,但短途就辛苦啲;例如部分路線,可能15分鐘已行完,公司會比足30分鐘車長完成路線,但朝早繁忙時間,上客可能要5分鐘,或者該區無咩配套,居民通常要搭車出去消費,又可能乘客比較多老人家或輪椅客,上客落客多人又緩慢,車長就會提早5分鐘上客,加埋20分鐘車程,所以只得好少時間去廁所。不過呢啲路線通常係畀新人做,因為路線簡單,做幾個月就會調出去,都唔使太擔心。

點解打風最開心?

好多打工仔知道八號風球落波要趕返工,都會怨聲載道。但巴士車長並唔係咁諗嘅。通常天文台宣布落波,公司會通知員工幾時要準備返工,咁上下時間就會有同事揸接送車,大家可以返廠準備。例如天文台話10點落波,公司就會叫員工8點返去準備,但好多人湧返去好混亂,要排隊等開,又或者未出得車住,有時會去附近飲茶等吓。有時坐上車,要等幾個鐘先開工,但計足全日人工,都幾和味。

其實唔會話好辛苦嘅,習慣就無問題,同埋打風都有津貼,加上揸車時條路無車,又少乘客,所以車長都幾鍾意咁樣返工。

被乘客投訴唔使驚

老實講,應付乘客係好麻煩,淨係睇新聞都知。最常見係乘客等車,但掛住玩手機唔知架車到站,或者無揚手示意,所以架車無停,就會拍門話你飛站;又或者關車門之後,之有人衝出來話做咩關門咁快,落唔切車,明明關門個陣已經有嘟嘟聲提醒。當然有車長會息事寧人,但都有師兄抵唔住頸鬧返轉頭。其實,鬧唔鬧呢啲乘客都會投訴……公司都明事理嘅,通常會出通告叫你注意返就算。除非係好嚴重嘅事,先要見主任講清楚。

總結

簡單來講,呢份工比上不足,比下有餘,人工或晉升機會唔係好多,唔會突然加幾千蚊人工,而且有頂點薪酬。做車長一段時間後,若然無乜意外或好多人讚,可以升做高級車長,但工作性質無分別,不過可以申請做教車或者主任。但係,鍾意揸車就會幾OK呢份工,同埋都會有份使命感嘅,試過有似見到工人帶小朋友搭車,落車時媽媽喺出口等,即刻就攬住小朋友,都幾令人感動,覺得自己要好有責任感關顧全車安危。當然,有事自己都會受傷,所以緊記,小心駛得萬年船。