Career Advice Tips to be more productive

【辦公毒男手記】 同事群組中的#me too

近年由歐美流行的#me too風潮吹到香港,掀起一股性侵翻舊賬風雲,在網絡上更激起女權vs屈機的大辯論。近日,#me too風竟吹到我的同事群組中。

女同事Mandy率先在一訴苦Post中用上#me too標記,大家堅嚇一跳,以為性騷擾/性侵疑雲在公司裏發生!

原來,無咁嚴重,Mandy只係指控,有天她穿了一件「少少低胸裝」,而某高層望向她時有點「色迷迷」,不過沒有任何其他語言上或行動上的性騷擾。即係話,某高層乜都無做過。

然後,女同事紛紛加入,挖苦某高層目光咸濕,人又樣衰。

本來,女人鬧男人咸濕,正常男人都唔會搭嘴,免得成為女人公敵。偏偏,後生細仔的Roy不知是否平時做鍵盤戰士做得多,竟然義正辭嚴撐高層,強調#me too唔係咁用、唔應該亂用。

於是,群組忽然靜晒,無人回文搭爹,氣氛Odd晒!

後來,唔記得隔了幾耐,有人出聲打圓場,講開某高層平時無理取鬧的話題。

一講高層無理取鬧,人人超有共鳴x10,案例蜂湧而出,有如滔滔江水連綿不絕,又有如黃河泛濫一發不可收拾。

對唔治,忽然用上星爺對白,因為有同事話,某高層試過鬧人時,語氣似足《食神》周星馳在天台X人的一幕,完全係人身攻擊,冇品兼賤格。

佢咁講完,其餘苦主又撲出來跟機,憶述被某高層罵時幾咁受侮辱。接著,同事紛紛回文話#me too。原來好多人都受過食神式嘅凌辱。

大家都咁陰公豬,這次Roy仔也不敢犯眾怒,指正大家誤用#me too了。

 


以上文章刊於《招職》。