Career Advice Tips to be more productive

做上司最基本要識尊重人

早排去銅鑼灣一間快餐店食下午茶,話說當日係星期六,銅鑼灣星期六人多擠逼就梗㗎啦,食嘢都預咗要排隊等。去到嘅時候都已經有好多人排緊隊買嘢食,不過就得一個Counter開咗,但呢個收銀姐姐做嘢算快手,好快就消化咗條隊。

呢間快餐店唔使交飛,直接買完就可以攞住個冧巴等,我叫朋友坐低之後就出去櫃面等,但係出到去就感覺到有啲唔對路 ⋯⋯

首先我見到櫃面前面企咗好多人,大家都雙目呆滯咁望住櫃枱,有啲人就拎部手機出嚟打緊機,好明顯大家都已經等咗好耐。我企咗喺度幾分鐘,已經有幾個客人衝出嚟問,其中有個婆婆話佢等咗20分鐘都冇嘢食,我心諗莫非今次中伏?

啲客等唔到嘢食都唔係重點,我留意到櫃枱後面啲職員人數唔係少,個個都已經做到踢曬腳,不過佢地都有一個共通點,就係個個都黑口黑面,而好快我就知發生咩事 ⋯⋯

冇幾耐又有一個客人走埋嚟催嘢食,呢位客人問嘅對象係一位明顯比較高級嘅職員,我估計係經理或者副經理。呢位經理睇完客人張單之後冇直接答客人,反而即刻對隔離個員工破口大罵:「咪叫咗你跟囉 ⋯⋯ 你要XXXXX先得㗎 ⋯⋯ 你咁咁咁點做嘢呀?」被罵嘅員工冇出聲,只有繼續執餐,處理咗呢個投訴嘅客人。呢位經理大罵員工時引嚟食客嘅目光,當然大家都係等嘢食唔會出聲,但我就覺得咁樣喺客面前鬧人已經有損公司形象。

冇幾耐又有另一件事發生,頭先剛剛被人鬧嘅員工,同廚房入面嘅廚師講咗兩句嘢,然後廚師突然喺廚房入面大大聲鬧出嚟。呢個時候頭先位經理即刻走出嚟處理,但佢嘅處理方法係加入戰團,兩個一齊鬧,結果雖然大家都收咗聲,但面口就比之前黑上加黑。最後我都差唔多等咗20分鐘先等到個餐,以快餐店嚟講絕對唔合格,但因為有戲睇關係,其實都算過得快。

喺呢短短20分鐘,已經睇到上司對下屬缺乏尊重而導致士氣非常低落,而士氣同工作效率又息息相關,或者正正解釋到佢地出餐混亂嘅原因。每次見到啲上司當眾鬧下屬我都覺得好厭惡,每個人都應該得到基本嘅尊重,做得上層就更加要識得尊重你嘅下屬。當眾鬧下層可能彰顯到一時權威,但其實有失身分之餘,更顯得領導、溝通能力及EQ低嘅弱點。

正所謂家醜不出外傳,有咩事平心靜氣返去慢慢傾。大蝦細被肥料餵,領導唔係以大欺小,玩弄權力,真正嘅領導者會保護同幫助自己嘅下屬。如果做上司嘅唔識得尊重人,最終啲人走曬都只係自食惡果。