Career Advice Job seek in HK

返新工前做足準備

你等咗咁耐,終於可以等到返新工呢日。如果你喺一個地獄逃出嚟,自然會特別期待呢一日。不過千萬唔好因為逃出地獄而過度興奮,為咗避免第一日就將新公司變成另一個地獄,返新工之前一定要做足準備。

1. 執齊啲嘢

返新工前,HR應該喺電話同你講咗要帶啲咩。唔好因爲有job offer而太興奮,除咗人工福利之外,其他嘢都當人地發噏瘋聽唔入耳。每間公司第一日返工都會有唔同嘅文件需要你帶上去,身分證副本?有!銀行戶口證明?有!相?有!舊公司嘅嘅工作證明?有!帶齊啲嘢,第一日返工留個好印象。

2. 調整作息時間

雖然逃出地獄係好值得慶祝嘅事,不過返工前一晚千祈唔好因爲太興奮而要攪個通宵party慶祝。因為如果你慶祝過度,隨時可以一秒將你嘅未來天堂變地獄。首先,第一日一定唔可以遲到,早啲瞓,第二朝預早少少出門口是常識吧。另外,見過唔少人第一日返工就烏眉瞌睡,反應慢三拍。如果你朝早返工就唔夠精神,晏晝食完飯,飯氣攻心好易瞌眼瞓。新老細見到你個人冇乜朝氣,印象分一定扣唔少。

3. 準備適量私人物品

一般人第一日都係輕輕便便咁返工,不過我曾經見過有位新同事,佢第一日返工嚟到人事部,除左拎住自己個靚包包之外,仲拎住個大紙箱。於是我好奇咁問佢:「咦,咁大箱嘢嘅?」佢一聽完就用興奮嘅眼神望住我話:「哦!冇咩特別,我諗住拎啲嘢返嚟裝飾下個位啫。」我心諗會唔會多咗啲?第一日就要完全佔領個位?如果你份工自己有個位,其實帶少少私人物品返去都有好處,至少畀老細見到你有種「settle down」嘅感覺。不過第一日就唔駛帶一箱嘢嘅,帶隻杯或帶件小飾物都好夠㗎喇。

4. 調整工作心態,忌帶舊公司文化

好多人第一日返工都冇調整自己嘅工作心態。當搵到份新工,往往都會幻想到佢十分美好,結果就好易做成期望越大、失望越大嘅情況,間接亦令自己容易咗放棄。如果上一份工做得比較耐,就更需要調整工作心態去適應新環境。例如喺舊公司你坐喺個位度唱歌喺冇問題,但去到新公司你突然高歌一曲人地可能會當你痴線。又例如舊公司影印可以用彩print,新公司就可能會畀人鬧浪費。你唔好同老細講「我以前舊公司係可以乜乜乜⋯」通常老細一聽到就好易著火:「呢度唔係你舊公司喎。」當你十分習慣舊工作嘅文化,去到新公司就需要適當咁調整一下。轉咗工身邊好多嘢都會改變,冇做足心理準備,可能好快就會因唔適應而想離開。

每次返新工對你嚟講都可能係人生一個大日子,份工隨時係你未來幾年發圍嘅好機會。好開始係成功嘅第一步,你準備好未?