Career Advice Job seek in HK

面試點解唔好亂咁吹?

相信大家細細個就聽過「講大話,甩大牙」,但大個咗啲乳齒甩曬之後,就知道講大話其實唔會甩大牙,於是慢慢會開始嘗試再講大話。出到嚟做嘢,為咗喺競爭激烈嘅社會爭取上流機會,得到更多回報,有啲人會嘗試喺面試嘅時候冒險吹水講大話。佢地以為面試等於吹水,過咗海就係神仙,但其實面試亂咁吹可以好危險。個海係唔係咁易過?過咗海又係咪真係做到神仙?少年,你真係唔好咁天真。

 

原因一:面試官經驗豐富

千祈唔好以為呃到一次就呃到第二次,若然未報,只係時晨未到。一個大話呃唔呃到人,除咗睇你嘅講大話技巧,另外都要睇對方識唔識得拆穿你。通常經驗豐富嘅面試官對大話都特別敏感,遇到有可疑嘅地方都會問多幾句。就算佢知道你講大話仍然會不動聲色,當你知道畀人chok到可能已經太遲。唔好見有啲面試官個樣好後生就以為佢係菜鳥,佢可能一日見十幾廿人,見人講大話多過你講大話,幾年累積落嚟已經閱人無數,想呃佢?冇咁易!

 

原因二:你可能面對老行尊

「講你之前嘅工作經驗嚟聽下吖。」

「我之前喺專門做細菌實驗嘅實驗室做助理,平日除咗入實驗室掀緊急掣之外,仲會做下細菌化驗。我識得用最新嘅超人死光殺菌技術,咩菌都殺得死。」
如果佢係一個行外人可能真係會以為你識用超人死光好威威,但係如果係一個做咗幾十年嘅老行尊,唔係你喺面前吹一句就得,你可能真係要喺佢面前示範下超人死光。好啦,就算佢唔test你畀你過咗關,但有啲嘢係識就識,唔識就唔識,一做就知龍與鳳,咁你準備定再搵工都得喇。

 

原因三:背景調查

就算畀你嘅謊言過到面試官嘅關口,去到HR做背景調查呢一關,紙最終都唔會包得住火。除非你有本事收賣曬你做過嘅公司同讀過嘅學校,否則當公司寄封信過去調查嘅時候,佢地都會如實咁回報你嘅背景資料。刻意寫高嘅人工、隱瞞被解僱、自己升自己嘅職、偽造嘅學歷,全部都無所遁形。畀老細發現有個鍾意講大話嘅人喺身邊,就算你識超人死光又如何?

 

原因四:後果可以好嚴重

喺職場入面被發現誠信有問題,後果可以好嚴重。好彩嘅話,最多間公司都係唔請你;如果行頭比較窄,面試官之間有交流,就好易影響轉工嘅機會。如果過五關斬六將之後,入到間公司先畀人發現嘅話,相信冇得留低嘅成數都幾大。更嚴重嘅情況係,如果有人膽大包天到使用虛假文件,甚至可能會被送官究治。冇得留低事小,個底花咗事大。之前吹得咁辛苦,因小失大,為乜呢?