講出黎都慚愧，自己做咗呢行幾年，係人事關係上仲未學精，警戒心太低會俾位人入。喺Office，年紀相若嘅一班女仔好易聚埋一齊，表面上好歡樂，講飲飲食食化妝扮靚，一齊注視男神Target，又會呻下公事，不過私底下好少交流。
平時嘻嘻哈哈當然唔會流露一個人嘅真實性格，一有利害關係就容易露出尾巴，而女人更加係你估唔到有幾口不對心。早前部門有個空缺，大家一早知阿Jane恨左好耐，夠年資又識得個空缺位嘅新「掃把」，佢申請嘅話應該十拿九穩。而同一時間，有傳會開多一個新職位，我心思思想申請，所以就走去問下班姊妹意見，可能佢地收到風有多啲資料參考下呢！
「咦？點解無聽你講過對呢個職位有興趣嘅！嗯……經理有無叫你去申請先？」Jane同一位經常出雙入對嘅姊妹表現得好愕然。
「無啊，唔係自己想就報得架啦咩？」我呆頭呆腦直接問。
「可能你未有經驗啦，我地呢度一向嘅習俗係有人推薦去申請先有機會架，同埋呢……聽聞好似有心水啦！不如等下次先？」果然，佢地係知道啲內情。
「有得升職加人工嘅位，報咗先無壞，雖然我都知年資唔係幾夠，不過睇下夠唔夠料爭取到Interview機會都好啊。 」當時仲覺得Panel又唔係得一個人，就算今次內定咗，話唔定覺得我有某啲合適嘅條件啱做其他位呢！
「咁嘅……唔怕講埋你知……其實未Confirm呢個位係咪有得長做架，唔係筍位嚟，聽聞一年後無Budget會逼住變返做Temp位，仲好似要返Shift添！」空穴來風，未必無因，就只係最後兩個原因已經足以令我放棄。
一直以為姊妹「好心」講我知真相，等我唔洗為咗一個辛苦位盲搞一輪。
招聘Deadline過左幾日，同個Senior食Lunch時咁岩佢問起我有無留意呢個職位，因為佢就正正係負責處理今次招聘嘅同事。「阿熊，你都知啦，嚟緊個新位會係Kitty轉過嚟，都幾乖女架佢。 」一聽到個名就開始有啲疑惑，「我無記錯既話，Kitty咪係Jane佢地個死黨？」Senior好爽快咁講，「梗係啦，Jane咁口密？係佢介紹俾經理架嘛，Kitty轉咗新位應該日日可以準時收工，個新『掃把』又咁好人，執到啦……」依稀仲有一大段呢個筍位既簡介……不過已經聽唔落去。
神推鬼㧬知道真嘅「真相」，係姊妹嘅話，不妨老實同我講已經有人選，反正結果都一樣。之前太單純誤以為姊妹係為我著想，原來只係一種手段去擴大小圈子，至少知道自己對其他人嚟講算係一個威脅。選擇職場上嘅「姊妹」等同押注，押得啱嘅，事無大小都預埋你一份，分擔工作上嘅辛勞。押錯嘅，有起事上嚟就左右推搪，甚至不留情面暗啞底出計仔打壓你。
你話啊，姊妹呢樣野幾咁可怕！
