「周街都係人，唔知同男友去邊度食好。」就到七點，我嘅好同事兼老死WhatsApp我。
「唉，我仲喺公司啊。」悶悶不樂嘅我迅速回覆佢。
「吓，搞咩咁夜啊？」訊息入面流淚嘅表情符號都幾貼切我當下嘅心情。
「阿頭安排咗個Second interview喺七點，房已經Set好，要等個Candidate嚟In完，執埋手尾先走得。」好無奈，白白加班個半小時，就係為咗等個Candidate收工過嚟。
「唔係嘛，又係咁，點解次次都要就個Candidate呢？明明預早個幾星期通知架啦，又唔係離開咗香港，無咩理由就佢一個啫。」
鬼叫工程部個總經理睇中咗個Candidate喺MNC嘅廿年經驗咩，同我講話佢想幾時嚟都盡量就。我明白難得有個啱心水嘅點都想「扑鎚」，不過咁就對另一班早兩日一齊嚟In嘅人唔公平啦。其實好簡單，如果第一輪揀唔到人，咪係第二輪搵返本身嚟唔到嗰啲人，就算只係見佢一個，成件事係順理成章。私人公司話之你，鍾意點都得，但係公營機構吓吓跟規矩，句句講Policy，被人投訴就頭痕啦，我地作為人事部就係要幫班大佬們死守呢條底線。
對於一間大規模機構嘅定位，絕對要分清楚莊閒。你要人，我負責幫你搵人，遊戲規則亦要跟足，要記得公司嘅代表係我地。要不著痕跡去捉到兔仔，就唔好被人牽住鼻子走。而家嘅打工仔好醒目，同時申請多間公司嘅Job去博取多個機會，所以要企硬自己立場，小心將話事權不知不覺雙手奉上。
近呢兩年，一出招聘廣告，不論係老中青嘅應徵者，係多咗人會直接打嚟提出佢地嘅疑問，確保可以Involve晒每一個過程。「喂喂，我網上申請咗份工架，收到個Auto email confirm嘅；不過呢，想睇吓你地係咪真係收到我份CV？不如你用你個Email覆我話收到穩陣啲。」白紙黑字嘅確認都唔相信，完完全全抹殺左Auto reply嘅作用。我會口頭答覆你，但係唔好意思，我認為無必要例外去「貓」你。
「我想知而家進度去到邊？有咩人做Panel？成兩個星期啦，我無收到任何通知，係咪即係落選咗啦？點算啊？」嗯……我唔講得你知，我真係唔講得你知架，明明Remarks已寫明幾耐無通知就Assume係落選，點解仲要多口再問？「唔該你詳細解釋下份工嘅工作範疇，平時有咩Task要跟？等我嚟緊Interview有多啲準備嘛。」Job description係最大提示，唔可能細緻到每一個Task都List out，不如留返喺面試先問？要準備嘅唔係比你知道晒所有細節然後翻讀一次，而係透過你有嘅獨特經驗同知識，話比人知你嘅能力去到邊，加上抱住一個怎樣的工作態度。對住一連串嘅問題，一定要做好對外保密嘅工夫。
而內部嘅大佬們好多時想快手Fill咗個空缺就會對我地施壓，「差嗰一個月經驗，照叫埋佢嚟In 啦！」、「佢話個Degree今年讀完，當佢會Pass先啦！」你當然可以做「差不多先生」隻眼開隻眼閉，因為負責任守尾門嘅係我地，講明Basic requirement係咩就只可以照單執藥，我地嘅執著好多時不被理解，以為諸多挑剔唔為佢地著想，搞到要一個人打三份工。壓力推落嚟，都唔可以心軟！唯有另外諗方法，試吓下次將個廣告放喺第二個媒體出，又或者稍為降低Entry requirement，睇吓會唔會吸引到多啲申請者。喺公營機構工作就係咁，諸多掣肘嘅情況下盡可能用正途去達標，千祈唔好逾越翻唔到身嘅底線！
圖：Shutterstock
以上文章刊於《招職》。
