唔知你有無遇過，有啲心地唔好嘅上司，佢地會好輕視成班小薯聚埋嘻嘻哈哈好歡樂個童真樣，故意挑起小薯之間嘅矛盾，等佢地自動自覺收斂下之餘，亦會諗計仔將佢地作為自己嘅辦公室政治工具。
自從上咗管理層之後，呢班上司要處處防犯政治陷阱，搞到每日返到公司就好憂慮，已經唔知幾耐無喺人前真心笑過。如果下屬做錯大鑊野，歸咎責任時又係自己食晒，仲要笑笑口湊老闆，一有咩差池好易影響到前途，所以好多時壓力大到令佢地偏離正軌行事。
早排有兩位小鮮肉加入咗我地部門，大家都知HR不嬲少男仔，當然會係「搶手貨」啦！兩個死對頭Team head一人爭一個，大家嘅惡夢就開始了。先係不停將小薯嘅能力公開比較，「David仔，記唔記得上次老闆咪叫你幫手整Excel個Pivot table咪搞咗好耐都係好多數亂晒嘅，之後俾返我地阿John再跟跟，原來好簡單按兩個掣就搞掂，你真係要請教下佢點做啦！」我地阿頭真係唔野少，搵位踩人地一腳嚟讚自己下屬，刻意令新同事介意自己技不如人，又誤導其他人覺得係咪阿John被睇好上位呢？醒目嘅梗係識埋堆，就會開始有小圈子出現。
有上司心態好小家，會專登將一份文件分開幾Part俾幾位小薯去做，成個Process只有佢一個人知道，驚死人地學識晒唔再需要佢，但通常結果都係因為無明確指示而亂晒籠，A做完唔知Pass俾邊個，呀邊個又以為啲野係阿B做，點知做漏咗，最後上司扯晒火，野做唔好，同事又唔甘心被責怪，將責任左推右卸，各自心生不滿。
而到咗年尾做Appraisal或計算Bonus嘅日子，平時Hea底嘅小薯都會突然發力爭取多一點表現，向上頭示好。「每次有Function，我地條Team嘅David仔都實會嚟幫手，不過似乎無咩見阿John出現喎，大好機會都唔出席下大場面學下野？係阿頭唔肯放人定係真係忙到嚟唔到啊？」句句有骨，搞到夾喺中間嘅小薯好無奈。Extra work雖然要OT做，但小薯好明白識人好過識字嘅道理，可以趁機喺眾經理前露面認識下，邊個會執輸？不過上頭鍾意Keep住你係身邊安安份份喺位做野，John只有眼白白羨慕人地，然後合埋把口繼續打信出Email聽電話吧，咁樣可能就不自覺會嫉妒同級同事。同期入職嘅就算表面上幾咁Friend過打Band都好，心裡面一定會有比較，工作量、發揮機會、同事嘅協助和上司喜愛自己程度等，謹慎Track住每樣野再去計劃下一步，如果無上司提攜或者為你點明燈，條路一定比其他人難行。
上司們或許以為自己做細嘅時候都係要咁樣被利用被受氣，所以而家新嚟嘅梗係都要捱下啦，好平常啫。小薯價值嘅高低其實好睇上司願唔願意去俾機會，純粹為娛樂自己想食花生睇戲，浪費咗有嘅資源，咁到最後又有咩好處呢？
圖：Shutterstock
以上文章刊於《招職》。
