過咗新年拎晒雙糧花紅後，見下午茶開始有散水餅出現，即係轉工潮又開始了。
話說有位工作近五年嘅女同事，對外一直好得人心，出咗名係好好小姐，而對自己老闆都算唔話得，幾乎隨時On call，需要佢幫手時一定及時喺度撐住個場，如無意外嘅話一有空缺無走雞係由佢上架啦。點知人生就係有太多估你唔到嘅事，調咗一位唔憂做嘅肥哥哥嚟Under佢。呢位哥仔好識撈，經常貪完小便宜後拎啲戰利品返嚟哄老闆開心，平時又好落力照顧佢……啲花花草草。雖然肥哥哥靠唔到樣搵食，不過就好識扮擔屎唔偷食嘅老實人，周圍吹水「關心」人地嘅生活狀況，等人地對佢放低戒心。工作上呢，就推得就推，話自己身體有事唔適宜操勞，好好小姐有時都費事等佢慢慢做「行」嘢，自己攬埋上身做。久而久之，兩個人嘅關係愈嚟愈差，肥哥哥開始散播謠言，楚楚可憐咁話俾人恃住高佢兩級恰得就恰，令佢就嚟壓力爆煲。
枕頭狀當然唔少得啦，反正老闆對佢工作上嘅要求唔高，全權交晒比好好小姐Follow，所以眼見耳聞佢嘅一舉一動都唔係真嘅。呢種人真係防不勝防，玩一招借刀殺人，加埋扮抑鬱發作，就成功將好好小姐趕離公司。
肥哥哥有晒我地部門嘅電腦Account，平時我地見好好小姐放咗假，已經係人地電腦自出自入唔使經佢阿頭批准。有次佢扮委屈同阿頭入房伸訴，就話好好小姐幾次E-mail咗啲尖酸刻薄嘅言詞責備佢，令佢工作上失去動力。大家心知肚明係佢自編自導自演啦，啲E-mail肯定係佢自己嘅作品，偷偷潛入好好小姐部電腦嚟Send比自己，呢件事火速傳開去，阿頭點都要做啲野，捉咗好幾位同事嚟問下好好小姐人格係點，平時工作態度如何等。
就算一致好評，最後好好小姐都係被迫提早解約。
人走茶涼，無人再睇實每個Task嘅死線，無人再幫佢揹飛，無人再自願做埋人地嗰份，肥哥哥當然將平時嘅工作放慢晒，等新人嚟到再卸晒俾佢。不過喺呢段真空期，阿頭當然依賴晒佢啦，時不時打嚟問野，「Peter，麻煩你Forward番上次同好好小姐一齊跟嗰個Music show事前出過比各單位嘅Memo同Letter比我啊！仲有呢，記唔記得邊幾間機構贊助我地？」肥哥哥心知不妙，自己一直只係掛名，「哦，係啊，有……唔好意思，聽咗電話先，轉頭話你知。 」立即開行Turbo入好好小姐電腦搵相關嘅Files逐個開嚟睇。就自行判斷幾個似樣嘅信快手快腳Send比阿頭睇下過唔過到關。唔使五分鐘阿頭打嚟詢問，「應該有幾封邀請信出咗架，你有無印象擺咗喺邊？」肥哥哥等咗呢個提問好耐啦，「係啊仲有幾封係好好小姐Keep架，我頭先專登Login佢部電腦都搵唔到，我當時Draft咗啲信比咗佢，最衰自己無留底啦，佢又無交低我知啲野點跟。 」難得死無對證，仲唔趁機會賴？阿頭一頭霧水，「明明佢個Handover list有架，嗯……可能Files太多未搵到啫，唔緊要啦，你用住個舊啲嘅Sample改少少野比我啦！」
肥哥哥呢種等你走咗仲要踩多兩腳嘅人多的是，貪盡你嘅便宜，然後自以為呃得到眾人。佢咁有自信皆因已轉咗長工，真係日日坐定定喺度，咩都唔使點做等收工你都炒佢唔到。山水有相逢，人地有料就算被你趕走都好快搵到大機構請佢，對佢嚟講無損失。而閒人帶著黑心去做人，係要還嘅。
以上文章刊於《招職》。
