( 上回提到：電視新聞的報道，令Stella原本已跟媽媽和好的關係，再次注入考驗。)
「好多人受傷，妳見唔見到呀？」聽到媽媽評論着年輕人該怎麼、該怎樣，Stella提高了聲線，從客廳向廚房那邊叫嚷。
「唔去衝咪唔會受傷囉！你好地地示威，表達果啲乜嘢訴求，人地唔會打你架；但係你影響社會既秩序，差人就要做嘢架啦 ⋯⋯」媽媽也同樣提高聲線，邊洗碗邊喊出來回應。
「依家係個政府唔啱先喎！政府唔搞咁多嘢，啲人就唔會咁憤怒，要上街抗爭啦！」
「妳都識講啦，女，政府呀嘛，政府即係政治，政治呢啲嘢，妳可以做乜嘢呀？一係你就去搞政治，如果唔係，做市民嘅，咪做好市民嘅本份囉 ⋯⋯」
Stella開始意識到內心的情緒愈來愈高漲，當中包含著憤怒、不公義、無力感、委屈、挫敗、焦躁不安、怨恨 ⋯⋯ 哪些情緒先湧上來，或是它們各佔多少的百分比，這刻已經分不清楚。同時，Stella知道假若讓對話延續下去，自己將會被情緒沖昏頭腦，蓋過理性的思考。「我要讓自己平靜下來，不要被外境激起內心的情緒。」Stella企圖控制自己的內心，自言自語地說。
另一邊廂，媽媽並沒有要停下來的意圖；在沒有聽到女兒有任何回應後，她續說：「成日話政府點點點，好似人地欠咗你咁 ⋯⋯ 個社會要繁榮安定，我地生活先可以有保障架；依家日日响度吵吵鬧鬧，做生意果啲先慘呀，條街咁樣，仲邊度會有生意啊，陰公 ⋯⋯」
愈抑壓 愈爆發
仍然努力地控制自己，Stella嘗試專注望着電視機的畫面，不把媽媽的「偉論」聽進耳內。
「妳千奇唔好去果啲地方呀，成世人都係衝衝動動，陣間人地叫衝，妳就會衝埋一份啦 ⋯⋯ 到時被人拉咗，唔好叫老豆老母保釋妳呀；打到頭破血流返來，無人會可憐妳架 ⋯⋯」媽媽愛之深、責之切，不自覺地用了很重的語氣，以及像冰峰般冷漠、刺人的用詞，向女兒表達出自己的感受。
一直使勁地按捺著自己情緒的Stella，聽到「無人會可憐你」這一句，內心立刻像被箭射中紅心一樣，隱隱作痛。不被允許釋放的情緒，最終亦因為一句話，決堤而出：
「我唔使妳可憐呀！衝動？我邊夠妳衝動呀，邊個成日因小小事就要攞刀出來斬人呀！我細果嘅時候就見識得多啦，妳同老豆兩個喺度你打我、我打你；如果我係衝動，都係遺傳咗妳啦！係呀，妳好想我被人拉，被人拉左，妳咪自己一個孤伶伶囉，妳都係想咁啫！所有屋企人被妳鬧走晒，妳就最開心啦，係咪！」抑壓的情緒，製造了傷人的話語；傷人的話語，如撥了出去的水，再也收不回來了。( 待續 )
