老闆、上司們眾多的偉論中，有一句，我經常聽見，每一次聽見時都好想講：我係咪要笑架？這句話，叫「我唔鍾意人地擦鞋」。
我不是腦細肚裏面條蟲，當然不知道他講的是不是真心話。但正所謂「不要聽他說甚麼，要看他做甚麼」，腦細身邊，就是擦鞋仔多。擦鞋，在學術上不知有沒有「官方定義」，就算有，肯肯定腦細的定義與眾不同。簡而言之，以下這類對白，對老闆來說都不算擦鞋：
「老闆你好耐之前講過某件事會這樣發展，哈我當時唔信架。好似你話個巿會跌，我心諗：邊可能丫。點知尋日真係跌500點喎。其實你點睇到的呢？」
「今時今日的後生仔唔識感恩。如果我初出道就好似佢地咁，遇到好似你咁好的老闆，我一定會好比心機做嘢，唔會諗東諗西。」
「老闆你唔好介意我直腸直肚，我份人有時就係唔識修飾。其實你點可以將咁大間公司管理得頭頭是道，仲可以分配時間享受人生？」
對腦細而言，這類對白當然不算奉承，那只是下屬由心而發的敬仰而已。是的，老闆唔鍾意人擦鞋，他們自詡喜歡聽真話，而所有順耳的說話都是「真話」。
通常，自命高瞻遠矚的腦細，亦好鍾意下屬向他「虛心討教」，而他就會無私地「分享」個人成功經驗，威水史閒閒地講足成粒鐘。我有一個精擅做「傍友」的豬朋狗友，他有一招職場處世格言：「唔好覺得自己係擦鞋，咁諗太負面！我只是發掘老闆的優點來加以『讚美』。咪當日行一善，你細個無做童子軍咩？」
能夠把奉承內化為日行一善的美德，佩服佩服。抵佢步步高陞嘅。
