唔經唔覺又4年，仲記唔記得上屆世界盃喺巴西舉行？香港人就陰功豬，場場波都喺凌晨或者朝頭早，有啲波6點開波，睇完半場就要出門口返工。當年決賽打到加時，睇住葛斯KO美斯，傷盡唔少阿根廷球迷嘅心。雖然一切仍然瀝瀝在，但4年話咁快就過，2018世界盃仲有半個月就開鑼。不過今年世界盃絕對係香港打工仔嘅福音，因為開好多賽事都喺放工時段開波，例如夜晚8:00、10:00、11:00，放工返屋企睇波唔駛捱眼瞓。
我地做HR嘅，世界盃正正係一個推出員工友善政策嘅好機會，正所謂人生可以睇幾多屆世界盃？作為一個好僱主，喺世界盃期間都一定要識做，好好同員工一齊慶祝下呢4年一度嘅盛事。咁樣員工就算睇波，都可以維持好嘅工作表現。
1. 攪個睇波party
既然今年世界盃香港有早波開，最早開波時間係夜晚8點鐘，絕對有條件考慮搵日收工攪個睇波團。想睇C朗嘅葡萄牙可以考慮6月20日葡萄牙對突尼西亞、想睇英格蘭嘅就可以考慮6月18日嘅英格蘭對突尼斯。如果諗住一係唔攪，一攪攪到盡，直頭可以考慮7月15日晚10點鐘一齊包個場睇決賽，搵埋老細與眾同樂，然後叫老細畀大家睇完波第二日遲少少返工。
2. 一齊睇精華
如果攪唔到睇波團嘅，都可以考慮喺世界盃期間每日搵個時段播返比賽精華。始終都有啲大戲碼會喺凌晨時段播，例如6月16日凌晨兩點就有場西班牙對葡萄牙，之後四強賽又喺平日嘅凌晨兩點，一般非超級球迷嘅打工仔都未必會捱眼瞓起身睇。員工返到公司，一齊坐低睇埋精華先開工，氣氛都興奮啲。
3. 世界盃佈置
如果攪唔到睇波團或者睇精華，簡單啲都可以做下啲小佈置，令辦公室添加啲世界盃氣氛。例如可以掛下決賽週國家嘅國旗、貼下啲球星海報，喺會議室做下啲主題佈置，然後喺當眼位置貼返張晉級路線圖，每日搵專人寫返賽果出嚟。
4. 有獎遊戲
公司有多少少budget嘅可以考慮攪個賽果競猜遊戲，每日嘅賽事猜中又被抽中嘅同事都可以得到小禮物一份。決賽嘅獎品就一定要特別豐富，終極大獎可以得到大老細親筆簽名相一張，今次一定冇得用獎門人tone講「打和～」啦。
5. 同員工講波經
如果平時同啲員工成日都搵唔到共同話題，世界盃就係一個好好嘅機會。如果冇睇開波嘅，打聽下同事係邊隊波嘅球迷，睇下賽果、比數、邊個入波都可以製造唔少話題，係時候拉近彼此之間嘅距離喇。
6. 調節辦公時間
最後一樣亦都係最重要，世界盃期間大家都好想快啲收工快啲返屋企睇波，呢個時候彈性上班時間政策就大派用場，如果有推行開嘅自然方便到同事，如果冇推行開嘅不失為一個試驗嘅好機會。決賽週都係一個月左右，一齊Happy吓啦！
