傳說中每個辦公室都有一兩個工作狂，嚴重啲嘅甚至成個office都係。晚晚做到三更半嘢，放工返屋企都繼續做，放假冇私人時間，同仔女出街都諗住公司個project⋯⋯人生好似只剩下工作，呢啲全部都係工作狂嘅特徵。成日都聽到人地形容一種生物叫「天生工作狂」，但工作狂係咪一定係天生煉成？其實可能又未必。
1. 熱愛工作的工作狂
呢種工作狂可以稱佢地為「真·工作狂」，佢地真心熱愛佢地嘅工作，返工就係嗜好，嗜好就係返工。「嗜好係返工」聽起上嚟好似好瘋狂，但呢個應該先係最理想嘅工作狀態。佢地可以真心喜歡自己嘅工作，而且全情投入。因為做緊嘅嘢係興趣所在，唔會恐懼星期一，日日返工都唔想放工，做到真真正正enjoy份工。最近美國嘅賓夕凡尼亞大學同北卡羅來納大學夏洛特分校
就做咗個研究，發現真心喜歡自己工作嘅打工仔，出現嚴重疾病嘅健康訊號都比長期受壓嘅打工仔低。工作太多對身體唔好？原來都未必。
2. 追求滿足感的工作狂
滿足感係推動一個人工作嘅重要因素，平時做面試或同離職嘅同事傾計，好多人都係因為搵唔到工作滿足感而選擇轉工。當搵到強烈嘅滿足感出現，工作狂就有機會慢慢煉成。例如當我地做嘢得到公司同同事嘅認同，得到嘅滿足感自然令我地更願意投入更多時間喺工作上面。曾經同一位做茶水同清潔嘅姐姐傾計，佢雖然OT冇錢，但見佢成日過咗放工時間仲喺公司幫大家執好啲地方、清理乾淨曬個pantry先會收工。佢話佢做嘢最大嘅滿足就係見到個office整整齊齊，大家做得開開心心，工作時間對佢嚟講已經冇乜所謂。
3. 太得閒而煉成的工作狂
呢種工作狂係比較特別嘅一種，佢地將時間擺喺工作上面，唔係因為工作滿足感或者熱愛份工作，而可能只係因為太多時間。佢可能本身冇乜嗜好，生活圈子比較狹窄，所以將自己嘅時間都擺曬喺公司度，當係打發下時間。問佢係咪好鍾意份工？問佢係咪做得好開心？Sorry，通通都唔係。其實只係因為平時冇乜嘢做，工作都只係想打發下時間。
4. 被迫成為工作狂的工作狂
最後一種相信亦係最常見嘅一種，佢地明明唔係工作狂，但就經常被誤會係工作狂。佢地超出常人嘅工作時間，其實都係為世所逼。
「因為要就歐洲嗰邊嘅開會時間，所以要夜晚做conference call。」
「啲嘢個客聽日要，今晚唔死掂佢唔得。」
「全行都係咁OT㗎啦，唔通唔做咩？」
「做我地呢行，24小時on call是常識吧！」
根據上面提及美國大學做嘅研究，呢類被迫成為工作狂嘅工作狂，壓力通常都比較大，更容易患上心臟病、糖尿病等等嘅嚴重疾病。工作還工作，都要小心身體呀各位！
