傳統上2至4月都算係結婚淡季，照計較少機會收到同事的紅色炸彈。但正因為係淡季，反而造就縮骨同事以「無差別」濫派請帖的機會。
派得比你預你唔去？
不少人都知道10月至12月係結婚旺季，一來秋冬天氣較清爽又少落雨，二來11月中到12月臨近聖誕增添不少浪漫氣氛。不過到2至4月撇除情人節，其餘日子都屬於淡季。皆因2月怕撞農曆新年，4月又怕親友復活節外遊兼碰上大吉利是的清明節。
正因為係淡季，縮骨一族就會發揮人棄我取精神以優惠價擺酒，較進取的玩法係刻意選擇偏遠地區，再超額派送請帖，以搏取人不到禮到的額外請飲收入。
兩大因素考慮回禮
正如港女常感慨人生總會遇到幾個「渣男」，人在職場，你亦總會收到幾名來自縮骨同事的「無差別」紅色炸彈。
既然係「無差別」濫派帖，派帖人可能係與你唔同Team唔同部門，即使大家同部門甚至同Team，平日都係無乜兩句，忽然收到對方的紅色炸彈，基本上你都幾肯定自己唔會去。通常收到夾有餅卡的帖，又或收到餅卡而無帖，你唔去飲都應該回贈人情，公價約300元。但純派帖甚至一個請飲邀請Whatsapp，對方只是「九唔搭八」的同事，就大可以「人唔到禮亦唔到」，反正大家都無乜利害關係，對方亦無你符。
當然你會諗到正因為派帖人係同部門同組所以無得慳，無端端破財300元，話多唔多、話少唔少，但心底始終有一點肉赤。這時候不妨給自己腦袋兩粒安慰糖，一是花費300元，即可以清楚了解派帖人有幾縮骨，提醒自己不要與此人做朋友兼且在工作上加倍提防對方的縮骨招數；二是這件事足以讓你與其他受害者同病相憐，平日悶悶地又可以再拎出來講，對提升大家的團隊精神反而大有幫助。
最後不妨提多一句，過去職場有不少真實例子，這類濫派「無差別」紅色炸彈的縮骨友，因為亂派帖連老細都得罪，之後公司要裁員就成為優先考慮人選。所以己所不欲勿施於人，將來到自己派帖時就不要重覆「無差別」派帖錯誤了。
