好多人不停轉工，但不停都搵到工，就算幾Jumpy，好似都對搵工唔構成問題。而Jump唔Jumpy對於請人嚟講未必係最重要嘅因素，只要經驗合適，紀錄良好，跳槽多幾次，對搵工嘅影響唔算太大。
雖然話就話轉工次數對搵唔搵到工影響唔大，不過對個人發展就可能有一定影響。轉多幾次工當吸收經驗唔係壞事，但慢慢如果冇穩定落嚟，或者轉工過於頻繁，到頭來可能對自己整個職業生涯構成影響。
如果每份工都做唔長，轉工嘅念頭頻密咁出現喺自己腦海，咁可能係時候要認真諗清楚自己點解要轉工。
1. 為錢？
喺香港打工，好多人都話魚唔過塘唔會肥，唔少人為求加人工而每年不停轉工。不過其實有冇諗過呢個情況可以持續幾多次？當新僱主見到你呢個「Pattern」，試諗下有幾多個仲會咁順灘加人工請你？其實除咗錢之外，有冇諗過一份工作仲有其他值得你留低嘅地方？例如發揮機會、晉升機會？
2. 有冇比足夠時間份工？
返新工最唔穩定就係頭幾個月，好多新嘢要學，仲有新工作、新同事、新老細要適應。正所謂「走得快好世界」，好多人一見唔對路就會即刻搵工走人。其實份份工都一定有佢難頂嘅地方，不妨比多少少時間落去，做多幾個月至一年，話唔定會搵到你發揮嘅機會。
另外，有啲人會話因為冇晉升機會而轉工，但係睇返佢份CV，喺間公司只係做咗幾個月。晉升機會一般情況都未必喺咁短時間內出現，如果真係要晉升，點都要啲時間浸一浸先可以得到老細嘅認同。
3. 其實你想要咩？
面試必答題：「點解你要轉工嘅？」其實想問你知唔知自己想要啲咩？但呢個問題其實最好搵工前問一問清楚自己。有朋友佢初期轉工表示想要Work-life balance，但當佢準時收工又覺得老細唔好；當下份工搵到個好老細，又覺人工唔夠高；之後搵到份人工高，結果又返返去晚晚OT嘅生活。兜兜轉轉，都搵唔到「Perfect池」。
世界冇咁多「Perfect池」，如果我地一直轉工都唔如意，每日返工等放工。其實我地真正想要嘅，係想喺工作尋找一點意義？還是想尋找發揮嘅機會？會唔會一直都沿住錯嘅方向走？會唔會我地其實一直都冇面對過自己，問清楚自己想要啲咩？
